मुंबईतील आंदोलनादरम्यान महिला आंदोलकाशी पोलिसाच्या कथित गैरवर्तनाचा व्हिडिओ सोशल मीडियावर व्हायरल झाल्यानंतर या प्रकरणावरून राजकीय वातावरण तापले आहे. काँग्रेस खासदार वर्षा गायकवाड आणि राष्ट्रवादी काँग्रेस (शरदचंद्र पवार)चे आमदार रोहित पवार यांनी या घटनेवर तीव्र प्रतिक्रिया व्यक्त करत संबंधित पोलिसावर कठोर कारवाईची मागणी केली आहे.
मुंबईतील आंदोलनादरम्यान एका पोलिसाने महिला आंदोलकाशी गैरवर्तन केल्याचा आरोप करण्यात आला असून, त्याचा व्हिडिओ सोशल मीडियावर मोठ्या प्रमाणात व्हायरल होत आहे. या घटनेनंतर विविध राजकीय नेत्यांनी पोलिसांच्या भूमिकेवर प्रश्नचिन्ह उपस्थित केले आहे.
काँग्रेस खासदार वर्षा गायकवाड यांनी सोशल मीडिया प्लॅटफॉर्म ‘एक्स’ वर पोस्ट करत संताप व्यक्त केला. “मुंबई पोलीस, हे कसले वर्तन आहे? छत्रपती शिवाजी महाराजांच्या महाराष्ट्रात महिलांच्या सुरक्षिततेबाबत अशा घटना घडत असतील, तर ही अत्यंत गंभीर बाब आहे. या महाराष्ट्राला तुम्ही काळिमा फासला आहे,” अशी टीका त्यांनी राज्य सरकारवर केली.
दरम्यान, आमदार रोहित पवार यांनी संबंधित पोलिस कर्मचाऱ्यावर विनयभंगाचा गुन्हा दाखल करून त्याला तातडीने अटक करण्याची मागणी केली आहे. महिला आंदोलकाशी गैरवर्तन करणाऱ्याविरोधात कठोर कायदेशीर कारवाई व्हावी, अशी भूमिका त्यांनी मांडली.
दिल्लीतील विद्यार्थी आंदोलनादरम्यान झालेल्या लाठीचार्जनंतर देशभरात सुरू असलेल्या आंदोलनांच्या पार्श्वभूमीवर मुंबईतील ही घटना चर्चेचा विषय ठरली असून, या प्रकरणात पोलिस प्रशासनाची अधिकृत भूमिका आणि पुढील कारवाईकडे सर्वांचे लक्ष लागले आहे.
Leave a Reply