उत्तरप्रदेशातील शामलीमध्ये हरयाणवी गायक आणि युट्यूबर अंकित बलियानच्या हत्येप्रकरणी पोलिसांच्या तपासात खळबळजनक तथ्ये समोर आली आहेत. प्राथमिक तपासात असं उघड झालं आहे की ही हत्या पूर्वनियोजित होती. उत्तर प्रदेश आणि हरियाणातील हल्लेखोर घटनेच्या सुमारे दोन दिवस आधीपासून अंकितचा मागोवा घेत होते. बुधवारी हल्लेखोरांनी अंकितच्या प्रत्येक हालचालीवर नजर ठेवली होती. त्यांनी घरातून जिमपर्यंत त्याचा पाठलाग केला आणि संधी मिळताच जिमबाहेर गोळीबार करून त्याला ठार केलं. हल्लेखोरांना अंकितच्या शेड्युलची संपूर्ण माहिती होती. तो घरातून कधी बाहेर पडतो आणि जिममधून कधी परत येतो हे त्यांना माहीत होतं. घटनेनंतर आरोपी तिथून फरार झाले असून पोलिसांकडून शोध सुरू आहे.
पोलीस आता जिम आणि आजूबाजूच्या परिसरातील सीसीटीव्ही फुटेजची तपासणी करत आहेत. संशयास्पद वाहनं आणि तरुणांची ओळख पटवली जात आहे. अंकितच्या ठिकाणाबद्दल आणि शेड्युलबद्दल हल्लेखोरांना माहिती कोणी दिली, याचाही पोलीस शोध घेत आहेत. अंकितचे काका चिकू यांनी पोलिसांना सांगितलं की, अंकितसोबत काम करणाऱ्या राणा नावाच्या व्यक्तीने त्याला धमकी दिल्याचं त्यांना माहीत होतं. धमकी देणाऱ्या व्यक्तीचा या हत्येमध्ये सहभाग असावा, असा कुटुंबाला संशय आहे.
पोलिसांच्या तपासात असंही समोर आलं आहे की हल्लेखोरांचं वय अंदाजे 21 ते 26 वर्षांच्या दरम्यान आहे. उत्तर प्रदेश आणि हरियाणातील संशयित तरुणांविषयीही माहिती गोळा केली जात आहे. हल्लेखोर कुठे राहिले होते, ते कोणाच्या संपर्कात होते आणि त्यांना अंकितचं ठिकाण कोणी पुरवलं, याचाही तपास ते करत आहेत. या तपासात पोलिसांची अनेक पथकं काम करत आहेत.
या हत्येनंतर अंकितची सोशल मीडियावरील पोस्ट चर्चेत आली आहे. हत्येच्या सुमारे दोन तास आधी अंकितच्या इन्स्टाग्रामवर त्याच्या गाण्याचा एक व्हिडीओ शेअर करण्यात आला होता. या व्हिडीओमध्ये ‘खास भाई की भड़क के ऊपर मर्डर मार दे सड़क के ऊपर…’ असे बोल आहेत. हा व्हिडीओ जास्तीत जास्त लोकांना शेअर करण्याचा विनंती त्याने केली होती.
अंकित मूळचा शामली जिल्ह्यातील बंटीखेडा गावचा आहे. गेल्या काही वर्षांपासून तो हरियाणातील रोहतक आणि सोनीपत इथं गायन आणि अभिनयाचं शिक्षण घेत होता. ‘भरी कोर्ट में गोली मारेंगे मेरी जान’ या गाण्यामुळे ओळखला जात होता. 2023 मध्ये शामलीतील एका रोड शोदरम्यानही तो चर्चेत आला होता.
Leave a Reply