आयसीसीने यावर्षी जून महिन्यात सर्वोत्तम कामगिरी केलेल्या खेळाडूंमधून ‘प्लेअर ऑफ द मंथ’साठी नामांकने जाहीर केली आहेत. भारतीय संघातील दोन खेळाडूंची नावे यात झळकली आहेत. पुरुषांच्या शॉर्टलिस्टमध्ये भारताचा एकदिवसीय आणि कसोटी कर्णधार शुभमन गिल, बांगलादेशचा अष्टपैलू खेळाडू मोसादेक होसेन आणि न्यूझीलंडचा वेगवान गोलंदाज नॅथन स्मिथ यांचा समावेश आहे. महिलांच्या शॉर्टलिस्टमध्ये स्कॉटलंडची कॅथरीन ब्राइस, भारतीय संघाची फिरकी गोलंदाज श्री चरणी आणि इंग्लंडची सलामीवीर फलंदाज डॅनी वायट-हॉज यांचा समावेश आहे.
शुभमन गिलने दाखवलेली सातत्यपूर्ण कामगिरी
कसोटी आणि एकदिवसीय या दोन्ही फॉरमॅटमध्ये भारताचे नेतृत्व करणाऱ्या शुभमन गिलने जून महिन्यात शानदार फलंदाजी केली आहे. त्याने अफगाणिस्तानविरुद्धच्या कसोटी सामन्यात 126 धावा केल्या. त्यानंतर एकदिवसीय मालिकेतील पहिल्या सामन्यात 84 धावा आणि दुसऱ्या एकदिवसीय सामन्यात 154 धावा केल्या. गिलच्या उत्कृष्ट फलंदाजीमुळे त्याला आयसीसी ‘प्लेअर ऑफ द मंथ’साठी नामांकन मिळाले आहे, जिथे त्याला मोसादेक आणि नॅथन स्मिथ यांना मागे टाकावे लागेल. मात्र, हे सोपे नसेल.
ऑस्ट्रेलियाविरुद्ध मायदेशात बांगलादेशच्या 2-1 मालिका विजयात मोसादेकने महत्त्वाची भूमिका बजावली. त्याने तीन सामन्यांमध्ये 116 च्या स्ट्राईक रेटने 157 धावा केल्या आणि दोन बळी घेतले. इंग्लंडविरुद्धच्या 2-1 कसोटी मालिका विजयात न्यूझीलंडचा नॅथन स्मिथ प्रमुख खेळाडूंपैकी एक होता. त्याने संपूर्ण मालिकेत 16 बळी घेतले, ज्यात लॉर्ड्सवर 70 धावांत 6 बळी ही त्याची सर्वोत्तम कामगिरी होती. या प्रभावी कामगिरीमुळे त्याला ‘प्लेअर ऑफ द टूर्नामेंट’ पुरस्कार मिळाला.
भारताच्या श्रीचरणीची कमाल
भारताची 21 वर्षीय फिरकी गोलंदाज श्री चरानी ही 2026 च्या टी- 20 विश्वचषकात गट फेरीपर्यंत सर्वाधिक बळी घेणारी गोलंदाज होती. तिने केवळ सहा सामन्यांमध्ये 14 बळी घेतले, ज्यात पाकिस्तान आणि दक्षिण आफ्रिकेविरुद्ध प्रत्येकी तीन बळींचा समावेश होता. नेदरलँड्सविरुद्ध 19 धावांत 4 बळी ही तिची सर्वोत्तम कामगिरी होती. डॅनी वायट-हॉज ही टी-20 विश्वचषकातील सर्वाधिक धावा करणारी खेळाडू होती. कॅथरीन ब्राइसने शेवटच्या सात टी-20 सामन्यांमध्ये 178 धावा केल्या आणि 11 बळी घेतले.
Leave a Reply