बॉलिवूड इंडस्ट्रीत सध्या गोविंदा आणि सुनीता अहुजा यांच्या वैयक्तिक आयुष्यामुळे चर्चांना उधाण आलेलं असतानाच त्यांचा मुलगा यशवर्धन अहुजा याच्याबद्दल एक वेगळीच बातमी सोशल मीडियावर व्हायरल झाली. कॉमेडीयन जॉनी लिव्हरची मुलगी आणि अभिनेत्री जेमी लिव्हर हिचं यशवर्धन अहुजासोबत लग्न होणार असल्याचा दावा करणारे व्हिडीओ सोशल मीडियावर व्हायरल झाले. या व्हिडीओवर अखेर जेमीने स्पष्टीकरण दिलं आहे. सोशल मीडियावर व्हायरल झालेल्या या व्हिडीओमध्ये जेमी लिव्हर आणि यशवर्धन अहुजा लग्नबंधनात अडकणार असल्याचा दावा करण्यात आला. सुरुवातीला हे व्हिडीओ पाहून जेमीला गंमत वाटली, मात्र जेव्हा मोठ्या प्रमाणात ही माहिती शेअर होऊ लगाली आणि तिला फोन कॉल्स येऊ लागले, तेव्हा तिने यावर स्पष्टीकरण देण्याचा निर्णय घेतला.
जेमी लिव्हरने या चर्चांना स्पष्ट शब्दांत फेटाळून लावलं आहे. तिच्या म्हणण्यानुसार, सोशल मीडियावर व्हायरल होणारे लग्नाचे व्हिडीओ पूर्णपणे बनावट आहेत. तिने यशवर्धनसोबत कोणताही रोमँटिक संबंध नसल्याचं सांगत तो माझ्यासाठी लहान भावासारखा असल्याचं स्पष्ट केलं. तसंच चुकीची माहिती पसरवणारे हे व्हिडीओ हटवण्याचं आवाहनही तिने केलं.
जेमी म्हणाली, “माझं लग्न.. मला माहीत आहे की बरेच लोक माझ्या लग्नाबद्दल काळजी करत आहेत. ते विचार करत आहेत की लग्न होणार की नाही, कधी होणार आणि यामुळे एआय वापरून काही बनावट व्हिडीओ तयार केले गेले आहेत. सुरुवातीला मी हे व्हिडीओ पाहून खूप हसले, मला खूप मजा आली. आम्ही चुलत भावंडं एकमेकांना व्हिडीओ पाठवत खूप धमाल करत होतो. पण आता मला खूप फोन कॉल्स येत आहेत. हे सगळे व्हिडीओ आणि ही सगळी माहिती खोटी आहे. अभिनंदन करणाऱ्या या फोन कॉल्समुळे मला अपेक्षित असलेली किंवा खरी लग्नाची स्थळंसुद्धा येत नाहीयेत. त्यामुळे मी लोकांना विनंती करते की त्यांनी असे व्हिडीओ बनवू नयेत.”
पहा व्हिडीओ-
View this post on Instagram
“हे सगळं खूपच कल्पक आहे आणि तुम्हाला आधीच खूप व्ह्यूज मिळाले आहेत. त्यामुळे आता तुम्ही ते व्हिडीओ डिलिट केले पाहिजेत. सर्वांच्या माहितीसाठी हे व्हिडीओ आणि ही माहिती पूर्णपणे खोटी आहे. त्यामुळे कृपया त्यावर विश्वास ठेवू नका. यशवर्धन आणि मी एकत्र चित्रपटसुद्धा करणार आहोत. तो माझ्या भावासारखा आहे. त्यामुळे असे मूर्खपणाचे व्हिडीओ बनवू नका”, असं ती पुढे म्हणाली.
गोविंदा आणि सुनीता अहुजा यांचा मुलगा यशवर्धन लवकरच बॉलिवूडमध्ये पदार्पण करणार आहे. ‘हिरो की हिरोइन’ या चित्रपटातून तो अभिनयक्षेत्रात पदार्पण करणार असल्याचं कळतंय.
Leave a Reply