DMart च्या ग्राहकांसाठी मोठी बातमी, आता शॉपिंग करणाऱ्यांना मिळणार मोठा फायदा, या वस्तू होणार स्वस्त

देशातील दिग्गज उद्योगपती आणि गुंतवणूकदार राधाकिशन दमानी यांच्या नेतृत्वाखालील Avenue Supermarts ने ऑनलाइन ग्रोसरी व्यवसायासाठी मोठी गुंतवणूक करण्याचा निर्णय घेतला आहे. DMart ची ऑनलाइन ग्रोसरी सेवा DMart Ready चालवणाऱ्या Avenue E-Commerce मध्ये तब्बल 500 कोटी रुपयांपर्यंतची अतिरिक्त गुंतवणूक करण्यास कंपनीने मंजुरी दिली आहे.

कंपनीच्या वार्षिक सर्वसाधारण सभेत (AGM) या गुंतवणुकीला मंजुरी देण्यात आली. या नव्या गुंतवणुकीनंतर Avenue E-Commerce मध्ये एकूण गुंतवणूक सुमारे 2,000 कोटी रुपयांपर्यंत पोहोचण्याची शक्यता आहे. यामध्ये आर्थिक वर्ष 2025-26मध्ये करण्यात आलेल्या 350 कोटी रुपयांच्या गुंतवणुकीचाही समावेश आहे.

महसूल वाढला, मात्र तोटाही वाढला

DMart Ready चा व्यवसाय वाढत असला तरी कंपनीसमोरील मोठे आव्हान म्हणजे वाढता तोटा. आर्थिक वर्ष 2025-26मध्ये Avenue E-Commerceचा महसूल 17 टक्क्यांनी वाढून 4,094 कोटी रुपये झाला. मागील आर्थिक वर्षात हा महसूल 3,502 कोटी रुपये होता.

मात्र, याच काळात कंपनीचा तोटा 247 कोटी रुपयांवरून वाढून 307 कोटी रुपये झाला. त्यामुळे महसूलात चांगली वाढ होत असतानाही नफ्याच्या दृष्टीने ऑनलाइन व्यवसाय अद्याप आव्हानात्मक असल्याचे दिसते.

11 शहरांवर विशेष लक्ष

कंपनीने मागील आर्थिक वर्षात होम डिलिव्हरी व्यवसाय मजबूत करण्यासाठी विविध पावले उचलली. DMart Ready ची सेवा 18 शहरांपर्यंत विस्तारण्यात आली. तसेच आठ नवीन फुलफिलमेंट सेंटर सुरू करण्यात आले असून तंत्रज्ञान, ग्राहकांसाठीच्या इंटरफेस आणि डिलिव्हरी क्षमतेवरही गुंतवणूक करण्यात आली.

मात्र, आता कंपनीने आपले लक्ष अधिक केंद्रित करण्याचा निर्णय घेतला आहे. DMart Ready च्या ऑनलाइन व्यवसायातून सर्वाधिक उत्पन्न मिळणाऱ्या 11 महत्त्वाच्या शहरांवर कंपनीचा मुख्य भर राहणार आहे.

Avenue E-Commerce चे व्यवस्थापकीय संचालक आणि CEO अंशुल असावा यांनी गुंतवणूकदारांना सांगितले की, कंपनीला या 11 शहरांमध्ये टिकाऊ आणि नफ्यात चालणारे ई-कॉमर्स मॉडेल उभे करण्यावर पूर्ण लक्ष केंद्रित करायचे आहे.

ऑनलाइन ग्रोसरी कंपन्यांमुळे DMartसमोर आव्हान

DMartने ऑनलाइन ग्रोसरी प्लॅटफॉर्मकडून वाढत्या स्पर्धेचा उल्लेख केला आहे. Blinkit, Zepto, Instamart सारख्या क्विक-कॉमर्स कंपन्यांच्या वाढत्या लोकप्रियतेमुळे पारंपरिक रिटेल व्यवसायासमोर स्पर्धा वाढली आहे.

या पार्श्वभूमीवर DMartने ऑनलाइन व्यवसायात गुंतवणूक सुरू ठेवण्याचा निर्णय घेतला आहे. मात्र, वाढता महसूल आणि वाढता तोटा यामुळे कंपनीसाठी ऑनलाइन व्यवसायातून नफा मिळवणे हे मोठे आव्हान ठरणार आहे.

Source link