मराठी अभिनेत्री हृता दुर्गुळे सध्या मराठी मनोरंजनविश्वातील लोकप्रिय अभिनेत्रींपैकी एक आहे. मालिकांसोबतच तिने चित्रपट, वेब सीरिज आणि नाटकांमध्येही आपल्या अभिनयाची छाप पाडली आहे. अभिनेत्री ‘दुर्वा’, ‘फुलपाखरू’ आणि ‘मन उडू उडू झालं’ यांसारख्या मालिकांमधून घराघरात पोहोचली आहे. ‘अनन्या’, ‘कन्नी’, ‘कमांडर करण सक्सेना’ आणि ‘आरपार’मधील तिच्या भूमिकांचेही चाहत्यांकडून प्रचंड कौतुक झालं आहे.
सध्या हृता ‘अगं आई अहो आई’ या झी 5 मराठीवरील वेब सीरिजमुळे चर्चेत आहे. या सीरिजमध्ये तिच्यासोबत रेणुका शहाणे आणि निर्मिती सावंत महत्त्वाच्या भूमिकेत आहेत. कलाकारांच्या अभिनयाला प्रेक्षकांकडून चांगला प्रतिसाद मिळत असतानाच आता हृताने तिच्या आगामी सिनेमाची झलक चाहत्यांसोबत शेअर केली आहे.
हृताचा हटके लूक चर्चेत
हृताने तिच्या इन्स्टाग्रामवर तिच्या आगामी ‘आली मोठी शहाणी’ या चित्रपटाचे पोस्टर शेअर केले आहे. या पोस्टरमध्ये ती अभिनेता सारंग साठ्ये यांच्यासोबत दिसत आहे. विशेष म्हणजे, हृताचा लूक पाहून चाहत्यांचे लक्ष वेधले गेले आहे.
पोस्टरमध्ये हृता शाळेच्या गणवेशात दिसत असून तिच्या गळ्यात टाय, दोन वेण्या आणि चेहऱ्यावर निरागस हास्य दिसत आहे. तर सारंग साठ्ये यांच्या कानावर जास्वंदीचं फूल दिसत असून ते हृताचे कान धरताना दिसत आहेत. पोस्टरचा हा मजेशीर आणि हटके अंदाज पाहून चित्रपटाबद्दलची उत्सुकता आता आणखी वाढली आहे.
कधी प्रदर्शित होणार चित्रपट?
पोस्टर शेअर करताना हृताने बाप्पाचा उल्लेख करत लिहिलं की, लहान असो वा मोठा, प्रत्येकजण गणपती बाप्पाकडे काही ना काही मागत असतो आणि तोही मोठ्या मनाने आपली मदत करत असतो. पुढे तिने हा चित्रपट आपलीशी वाटणारी, हलकी-फुलकी आणि निरागस गोष्ट असल्याचं म्हटलं आहे.
View this post on Instagram
‘आली मोठी शहाणी’ हा चित्रपट 2 ऑक्टोबर 2026 पासून सर्व सिनेमागृहांमध्ये प्रदर्शित होणार आहे. या सिनेमाचं दिग्दर्शन आनंद गोखले यांनी केलं आहे. हृता दुर्गुळे आणि सारंग साठ्ये यांच्यासोबत या चित्रपटात मराठी मनोरंजनविश्वातील अनेक लोकप्रिय कलाकार महत्त्वाच्या भूमिकांमध्ये दिसणार आहेत. ऋजुता देशमुख, मैत्रयी दाते, सुहिता थत्ते, गुरू ठाकूर, विशाखा नाईक आणि प्रशांत कुलकर्णी यांचाही चित्रपटात सहभाग आहे.
Leave a Reply