तमिळनाडूचे मुख्यमंत्री आणि अभिनेते सी. जोसेफ विजय (थलपती विजय) यांनी 22 जून रोजी आपला 52 वा वाढदिवस साजरा केला. यादिवशी देशभरातील कलाकारांकडून आणि राजकारण्यांकडून त्यांच्यावर शुभेच्छांचा वर्षाव झाला. मात्र सोशल मीडियावर चाहते अभिनेत्री त्रिशा कृष्णनच्या पोस्टची प्रतीक्षा करत होते. दरवर्षी त्रिशा तिच्या इन्स्टाग्रामवर विजय यांच्या वाढदिवशी खास फोटो पोस्ट करत आवर्जून शुभेच्छा देते. मात्र यावर्षी तिने 22 जून रोजी कोणतीच पोस्ट शेअर केली नव्हती. यामुळे त्रिशा आणि विजय यांच्या नात्यात दुरावा निर्माण झाल्याची चर्चा होती. अखेर मंगळवारी संध्याकाळी त्रिशाने खास फोटो पोस्ट करत या सर्व चर्चांना पूर्णविराम दिला. त्रिशाने विजय यांच्या वाढदिवसाच्या सेलिब्रेशनचा खास फोटो इन्स्टाग्रामवर पोस्ट केला आहे.
विजय यांनी त्यांचा 52 वा वाढदिवस त्रिशासोबत साजरा केला आणि या सेलिब्रेशनची एक झलक तिने या फोटोद्वारे दाखवली आहे. त्रिशाने पोस्ट केलेल्या या फोटोमध्ये विजय प्रिंटेड शर्टमध्ये दिसत असून त्यांच्या चेहऱ्यावर स्मितहास्य आहे. त्यांच्या बाजूला बसलेली त्रिशा त्यांच्याकडे बघत मनमोकळेपणाने हसत आहे. त्रिशाची नजर विजय यांच्यावरच खिळल्याचं यात पहायला मिळतंय. विजय यांच्यासमोर वाढदिवसाचे एक-दोन नव्हे तर पाच केक आहेत. या फोटोच्या कॅप्शनमध्ये त्रिशाने लिहिलं, ‘ज्या व्यक्तीमुळे हे सर्व सार्थक ठरतं, त्या व्यक्तीला वाढदिवसाच्या शुभेच्छा.’ यासोबत तिने हृदयाचा आणि एव्हिल आयचा इमोजी पोस्ट केला आहे. या कॅप्शनमध्ये तिने ‘00.00’ असंदेखील लिहिलं आहे. यामुळे चाहत्यांना असा संकेत मिळाला की रात्री बाराच्या ठोक्याला त्रिशाने विजय यांचा वाढदिवस साजरा केला.
त्रिशाची पोस्ट-
View this post on Instagram
त्रिशा गेल्या काही वर्षांपासून सोशल मीडियावर विजय यांच्यासोबतचे फोटो पोस्ट करून त्यांना वाढदिवसाच्या शुभेच्छा देत आहे. 2023 मध्ये तिने लोकेश कनगराजच्या ‘लिओ’ या चित्रपटाच्या शूटिंगदरम्यान बर्फाळ ठिकाणी काढलेला त्यांचा एक फोटो पोस्ट केला होता. याच चित्रपटामुळे अनेक वर्षांनंतर ते पुन्हा एकदा पडद्यावर एकत्र आले होते. 2024 मध्ये तिने विजय यांच्यासोबतचा एक मिरर सेल्फी पोस्ट केला होता. गेल्या वर्षी त्रिशाच्या पाळीव श्वानासोबत खेळतानाचा विजय यांचा फोटो तिने शेअर केला होता. मात्र यावर्षी 22 जून रोजी तिचा कोणताही पोस्ट सोशल मीडियावर न दिसल्याने चाहत्यांमध्ये कुजबूज सुरू झाली होती.
त्रिशा आणि विजय हे गेल्या काही काळापासून एकमेकांना डेट करत असल्याच्या चर्चा आहेत. या वर्षाच्या सुरुवातीला विजय यांची पत्नी संगीता सोरनालिंगमने घटस्फोटासाठी अर्ज दाखल केल्याची बातमी समोर आली होती. या अर्जात तिने विजय यांच्यावर एका अभिनेत्रीसोबत विवाहबाह्य संबंध असल्याचाही आरोप केला होता. त्यानंतर विजय आणि त्रिशा यांच्या अफेअरच्या चर्चांना आणखी हवा मिळाली.
Leave a Reply