NEET पेपरफुटी प्रकरण आणि विद्यार्थी आंदोलनाच्या पार्श्वभूमीवर पर्यावरणतज्ज्ञ सोनम वांगचुक यांनी तब्बल 26 दिवसांनंतर मध्यरात्री आपले उपोषण मागे घेतले. मात्र, उपोषण सोडण्याच्या प्रक्रियेदरम्यान आंदोलनाचे प्रतिनिधी उपस्थित नसल्याचा मुद्दा उपस्थित करत शिवसेना (उद्धव बाळासाहेब ठाकरे) खासदार संजय राऊत यांनी केंद्र सरकारवर तसेच या संपूर्ण प्रक्रियेवर गंभीर प्रश्न उपस्थित केले. माध्यमांशी बोलताना संजय राऊत म्हणाले की, सोनम वांगचुक यांनी सर्व आंदोलनकर्त्यांच्या उपस्थितीत जंतर-मंतरवर उपोषण सोडले असते, तर देशाला अधिक समाधान वाटले असते. सरकारविरोधात सुरू असलेल्या आंदोलनाचा शेवट आंदोलनकर्त्यांच्या प्रतिनिधींच्या उपस्थितीत व्हायला हवा होता. अभिजीत दीपके किंवा विरोधी पक्षनेते राहुल गांधी यांच्यासारखे प्रतिनिधी तेथे उपस्थित असायला हवे होते, असे त्यांनी मत व्यक्त केले.
राऊत यांनी प्रश्न उपस्थित केला की, सरकारने आंदोलनकर्त्यांच्या नेमक्या कोणत्या मागण्या मान्य केल्या याबाबत अजूनही स्पष्टता नाही. आंदोलनाची मुख्य मागणी केंद्रीय शिक्षणमंत्री धर्मेंद्र प्रधान यांच्या राजीनाम्याची होती. त्या मागणीचे काय झाले, याचे उत्तर केंद्र सरकारने देशाला द्यावे, असे ते म्हणाले. ते पुढे म्हणाले की, सोनम वांगचुक यांच्या 26 दिवसांच्या उपोषणामागे लाखो विद्यार्थ्यांचा आणि नागरिकांचा पाठिंबा होता. देशभरात विद्यार्थी रस्त्यावर उतरले, अनेक ठिकाणी आंदोलन झाले आणि या आंदोलनात हिंसाचाराच्या घटनाही घडल्या. अशा परिस्थितीत या आंदोलनाचा शेवट सरकारने श्रेय घेण्याच्या पद्धतीने होऊ नये, अशी भूमिका त्यांनी मांडली.
संजय राऊत यांनी दावा केला की, सोनम वांगचुक यांच्या आंदोलनातून देशातील शिक्षण व्यवस्थेतील बदलासाठी मोठे जनआंदोलन उभे राहिले असून ते आता थांबणार नाही. देशभरात विविध संघटना आणि राजकीय पक्ष आंदोलन करत असल्याचे त्यांनी सांगितले. मुंबईत आदित्य ठाकरे आणि अमित ठाकरे यांच्या नेतृत्वाखाली राष्ट्रगान आंदोलन आयोजित करण्यात आले असून, 26 जुलै रोजी उद्धव ठाकरे आणि राज ठाकरे यांच्या नेतृत्वाखाली विराट मोर्चा काढण्यात येणार असल्याची माहितीही त्यांनी दिली.
याशिवाय, उपोषण सोडवण्याच्या प्रक्रियेवरही त्यांनी आक्षेप घेतला. आंदोलनकर्त्यांशी संवाद साधण्याऐवजी सरकारने उपोषण संपवून त्याचे श्रेय घेण्याचा प्रयत्न केल्याचा आरोप त्यांनी केला. संसदेत या विषयावर चर्चा टाळण्यात आली, तसेच आंदोलन तीव्र झाल्यानंतरच सरकार सक्रिय झाल्याचा दावा करत राऊत यांनी केंद्र सरकारवर जोरदार टीका केली.
Leave a Reply