आज 5 सप्टेंबर राज्यासह देशात सर्वत्र दहीहंडी सोहळा उत्साहात सुरु आहे. परंतू सोबत विविध ठिकाणी अनेक गोविंदा जखमीही होण्याच्या घटनाही घडत आहेत. आता पिंपरी चिंचवडमधून एक दुःखद बातमी समोर आली आहे. याठिकाणी एका महिलेचा दुर्देवीरित्या मृत्यू झाला आहे. ही घटना नेमकी कशी झाली याचा तपशील आता समोर आली आहे. सदर घटनेचा CCTV व्हिडिओदेखील व्हायरल झाला आहे. महत्त्वाची बाब म्हणजे या घटनेनंतर गोविंदापथकाचा सदस्य असलेल्या मृत महिलेच्या मुलानं याप्रकरणी गुन्हा दाखल करण्यास नकार दिला आहे.
दरम्यान, ही घटना पिंपरी चिंचवडच्या जुन्या सांगवीतील दहीहंडी उत्सवासात घडली आहे. दहीहंडीसाठी उभारलेली लोखंडी कमान अंगावर पडून ४५ वर्षीय सलमा सलाउद्दीन पठाण या महिलेचा दुर्दैवी मृत्यू झाला आहे.
नेमकी कशी घडली घटना?
रात्री विघ्नहर्ता या मंडळाची दहीहंडी मोठ्या उत्साहात साजरी करण्यात येत होती. सर्वकाही सुरळीत पार पडले. परंतू हंडी संपल्यानंतर लोखंडी सांगाडा काढण्याचं काम सुरू झालं होतं आणि नेमकं याचवेळी अचानक लोखंडी भाग सलमा यांच्या डोक्यावर कोसळला. हा सर्व प्रकार रात्री दहा वाजेच्या सुमारास घडला. कोणाला काही कळण्यापूर्वीच अवघ्या पाच मिनिटांच्या आतच या ही घटना घडून गेली. दरम्यान सलमा या सर्व प्रकारानंतर प्रचंड जखमी झाल्या. त्यांना गंभीर जखमी अवस्थेत रुग्णालयात नेण्यात आलं, तिथे त्यांना तपासण्यात आल्यानंतर मात्र डॉक्टरांनी मृत घोषित केलं. त्यामुळे मंडळावर दुःखाचा डोंगर कोसळला शिवाय उत्सवाला गालबोटही लागलं.
दरम्यान आता या सर्व दुःखद प्रकारानंतर मृत महिलेच्या मुलाने मंडळाविरोधात पोलिस तक्रारीस विरोध केला आहे. कारण की मृत महिलेचा मुलगा मंडळात असल्याने कुटुंबीयांनी ठरवून नकार दिला आहे. इतर मुलं अडचणीत येऊ नयेत, अशी भूमिका कुटुंबीयांनी घेतली असून पोलिसांनीदेखील स्वतःहून गुन्हा दाखल करू नये, अशीही विनंती करण्यात आली आहे. दरम्यान, या घटनेनं जुन्या सांगवी परिसरात हळहळ व्यक्त केली जात आहे.
Leave a Reply