अभिनेता-दिग्दर्शक प्रवीण तरडे यांच्या आगामी ‘मुळशी पॅटर्न 2’ या चित्रपटाच्या नावावरून आता नवा वाद निर्माण झाला आहे. चित्रपटाच्या नावामुळे मुळशी तालुक्याची बदनामी होत असल्याचा आरोप करत मुळशीतील स्थानिक नागरिकांनी चित्रपटाच्या नावाला विरोध केला आहे.
यासाठी स्थानिक नागरिकांनी एकत्र येत ‘मुळशी बचाव समिती’ स्थापन केली असून, चित्रपटाच्या नावात बदल करण्याची मागणी करण्यात आली आहे. मुळशीकरांच्या मते, पहिल्या ‘मुळशी पॅटर्न’ चित्रपटामुळे मुळशी तालुक्याचं नाव देशभर पोहोचलं. मात्र, या प्रसिद्धीसोबत तालुक्याची ओळख गुन्हेगारीशी जोडली गेल्याची खंत स्थानिक नागरिकांनी व्यक्त केली आहे.
चित्रपटामुळे मुळशी म्हणजे गुन्हेगारी, गुंडगिरी आणि गुन्हेगारांचा तालुका अशी प्रतिमा निर्माण होत असल्याचा दावा समितीतील सदस्यांनी केला. या प्रतिमेचा परिणाम तालुक्यातील उद्योग, व्यवसाय तसंच स्थानिक युवकांच्या नोकरीच्या संधींवर होत असल्याचं त्यांचं म्हणणं आहे. एवढंच नाही तर युवक-युवतींच्या विवाहाच्या बाबतीतही मुळशीच्या या प्रतिमेमुळे अडचणी निर्माण होत असल्याचा आरोप करण्यात आला आहे.
चित्रपटाच्या नावाला विरोध करण्यासाठी स्थापन करण्यात आलेल्या मुळशी बचाव समितीची पहिली बैठक पौड गावात पार पडली. त्यानंतर आता तालुक्यातील विविध गावांमध्ये जाऊन स्थानिक नागरिकांशी संवाद साधला जात आहे. ‘मुळशी’ हे नाव चित्रपटासाठी वापरू नये, यासाठी गावागावात ठराव घेण्याची प्रक्रिया सुरू करण्यात आली आहे.
विशेष म्हणजे प्रवीण तरडे हे स्वतः मुळशीचे असल्याने समिती त्यांच्या भेटीसाठी जाणार नसल्याचं सांगण्यात आलं आहे. उलट त्यांनीच मुळशीकरांकडे यावं आणि चित्रपटाचं नाव बदलण्याची भूमिका घ्यावी, अशी मागणी समितीकडून करण्यात आली आहे.
समितीतील काही सदस्यांनी प्रवीण तरडे यांच्यावर गंभीर आरोपही केले आहेत. “प्रवीण तरडे स्वतः मुळशीचे असूनही मुळशीची बदनामी करून मोठे झाले आणि त्यातून पैसा कमावत आहेत,” असा आरोप काही सदस्यांनी केला आहे. त्यामुळे या मुद्द्यावरून आगामी काळात वाद आणखी वाढण्याची शक्यता आहे.
Leave a Reply