मुंबईतील उपनगरी रेल्वेमध्ये किरकोळ वादातून एका 22 वर्षीय तरुणाची चाकूने भोसकून हत्या झाल्याची धक्कादायक घटना समोर आली आहे. या घटनेमुळे लोकल प्रवाशांमध्ये भीतीचे वातावरण निर्माण झाले होते. मयंक लोहार असे मृत तरुणाचे नाव आहे. अंधेरी ते बोरिवली रेल्वे स्थानकादरम्यान काल रात्री सुमारे 10 वाजण्याच्या सुमारास ही घटना घडली.
त्या वेळी मुंबईत मुसळधार पाऊस सुरू होता. लोकलच्या डब्यात पावसाचे पाणी येत असल्याने मयंक लोहार यांनी दरवाजाजवळ उभ्या असलेल्या प्रवाशाला दरवाजा बंद करण्यास सांगितले होते. यावरून दोघांमध्ये शाब्दिक वाद झाला. काही वेळातच हा वाद विकोपाला गेला. संतापाच्या भरात आरोपीने मयंकवर चाकूने हल्ला केला. गंभीर जखमी झालेल्या मयंकचा मृत्यू झाला.
घटनेनंतर आरोपी घटनास्थळावरून फरार झाला होता. या प्रकरणाचा तपास सुरू करत पोलिसांनी विशेष पथके नियुक्त केली होती. पोलिसांनी धडक कारवाई करत काही तासांतच आरोपीचा शोध घेत त्याला कुर्ला परिसरातून अटक केली. या घटनेमुळे लोकल प्रवाशांच्या सुरक्षेचा प्रश्न पुन्हा ऐरणीवर आला आहे.
Leave a Reply