भारतीय संघ श्रीलंका दौऱ्यावर असून दोन सामन्यांची कसोटी मालिका खेळणार आहे. या मालिकेतील पहिला सामना 15 ऑगस्टपासून सुरू होणार आहे. या मालिकेपूर्वी भारतीय संघाला दोन धक्के बसले. संघात निवड झालेले जसप्रीत बुमराह आणि साई सुदर्शन हे दुखापतीमुळे बाद झाले. त्यामुळे बुमराहच्या जागी आकिब नबी आणि साई सुदर्शनच्या जागी सरफराज खान यांची निवड झाली. सरफराज खान शेवटचा सामना नोव्हेंबर 2024 मध्ये खेळला होता. त्यानंतर त्याला संघात काही स्थान मिळालं नाही. आता दीड वर्षांनी त्याच्यासाठी टीम इंडियाची दारं पुन्हा खुली झाली आहेत. असं असताना त्याची टीम इंडियात वर्णी लागली आणि 25 वर्षीय खेळाडूचं नशिब फळफळलं. कारण सरफराज खानमुळे दुलीप ट्रॉफीसाठी वेस्ट झोन संघात एक जागा रिक्त झाली आहे.
सरफराजची जागा जय गोहिल घेणार
वेस्ट झोन आणि मुंबईचे मुख्य निवडकर्ते राजेश पवार यांनी स्पष्ट केलं की, सरफराज खानच्या जागी सौराष्ट्रच्या 25 वर्षीय युवा फलंदाज जय गोहिल यांची वेस्ट झोन संघात वर्णी लागली आहे. गोहिलची संघात निवड होण्यापूर्वी स्टँडबाय खेळाडूंच्या यादीत होता. रणजी ट्रॉफीत सौराष्ट्र संघासाठी त्याने चांगली कामगिरी केली होती. जय गोहिलने 2022-23 मध्ये सौराष्ट्रला रणजी ट्रॉफी जिंकवून देण्यात मोलाचं योगदान दिलं होतं. त्याने डेब्यू सिझनमध्ये 9 डावात 37 च्या सरासरीने 337 धावा केल्या होत्या. आता हार्विक देसाईनंतर गोहिल वेस्ट झोन संघात सहभागी झालेला दुसरा सौराष्ट्राचा खेळाडू आहे.
जय गोहिल याने आपल्या क्रिकेट कारकिर्दीत 12 फर्स्ट क्लास सामने खेळले आहेत. त्यात त्याने 48 च्या सरासरीने एकूण 860 धावा केल्या आहे. इतकंच काय तर रेड बॉल क्रिकेटमध्ये त्याच्या नावावर दोन शतकं आणि चार अर्धशतकं आहे. आता दुलीप ट्रॉफी स्पर्धेत वेस्ट झोन संघाकडून ऋतुराज गायकवाडच्या नेतृत्वात खेळणार आहे. वेस्ट झोनचा पहिला सामना 23 ऑगस्टला नॉर्थ झोनविरुद्ध होणार आहे.
दुलीप ट्रॉफीसाठी वेस्ट झोन संघ :ऋतुराज गायकवाड़ (कर्णधार), शम्स मुलानी (उपकर्णधार), शार्दुल ठाकुर, मुशीर खान, तुषार देशपांडे, तनुश कोटियन, सिद्धार्थ देसाई, अतीत शेठ, पृथ्वी शॉ, शिवालिक शर्मा, मुकेश चौधरी, हार्विक देसाई (विकेटकीपर), जयमीत पटेल, उर्विल पटेल आणि जय गोहिल.
Leave a Reply