बृहन्मुंबई विद्युत पुरवठा आणि परिवहन (BEST) कर्मचाऱ्यांच्या संयुक्त कृती समितीने विविध प्रलंबित मागण्यांसाठी मध्यरात्रीपासून अनिश्चितकालीन संप पुकारला आहे. या संपामुळे मुंबईतील बेस्ट बस सेवा मोठ्या प्रमाणावर विस्कळीत झाली असून, लाखो प्रवाशांना त्याचा फटका बसत आहे.
संपाच्या पार्श्वभूमीवर आज सकाळपासून मुंबईतील बहुतांश मार्गांवर बेस्ट बस सेवा बंद असल्याचे चित्र दिसून आले. त्यामुळे कामावर आणि शाळा-कॉलेजांकडे जाणाऱ्या नागरिकांची मोठी गैरसोय झाली आहे. दादर, घाटकोपर, कुर्ला, अंधेरी यांसारख्या प्रमुख रेल्वे स्थानकांबाहेर प्रवाशांची मोठी गर्दी पाहायला मिळाली. टॅक्सी आणि रिक्षांसाठीही लांबच लांब रांगा लागल्याचे चित्र होते.
बेस्ट संयुक्त कामगार कृती समितीने सांगितले की, अनेक वर्षांपासून प्रलंबित असलेल्या मागण्यांबाबत प्रशासनाला वारंवार निवेदने देण्यात आली होती. मात्र, त्यावर कोणताही ठोस निर्णय न झाल्याने संपाचा निर्णय घ्यावा लागला.
कर्मचाऱ्यांच्या प्रमुख मागण्यांमध्ये बेस्टचा अर्थसंकल्प मुंबई महापालिकेच्या अर्थसंकल्पात विलीन करणे, सातव्या वेतन आयोगाची अंमलबजावणी, कंत्राटी पद्धत रद्द करणे, रिक्त पदे भरणे, पदोन्नती प्रक्रिया राबवणे आणि खासगीकरणाला आळा घालणे यांचा समावेश आहे.
दरम्यान, मुंबईत दररोज सुमारे 25 लाख प्रवासी बेस्ट बससेवेचा वापर करतात. तसेच बेस्टकडून सुमारे 10 लाख ग्राहकांना वीजपुरवठा केला जातो. त्यामुळे या संपाचा परिणाम सार्वजनिक वाहतूक व्यवस्थेसह इतर सेवांवरही होण्याची शक्यता व्यक्त केली जात आहे.
Leave a Reply