मनोज जरांगे पाटील यांच्या मराठा आरक्षण आंदोलनावर अजय बारस्कर यांनी तीव्र टीका केली आहे. जरांगे पाटील यांनी केलेले उपोषण हे ढोंगीपणाचे असून, त्यांचा आवाज आणि आवेश बदलल्याचे बारस्कर यांनी म्हटले आहे. त्यांनी जरांगे पाटील यांच्यावर समाजाची दिशाभूल केल्याचा आरोप केला.
बारस्कर यांच्या मते, जरांगे पाटील यांनी मागील आंदोलनांमध्ये “सगेसोयरे” आणि “हैदराबाद गॅझेट” यांसारख्या मुद्द्यांवरून समाजाला केवळ भावनिक करून फसवले आहे. आताही मुंबईतील आंदोलनाचा उद्देश स्पष्ट नाही, असे ते म्हणाले. घटनेने घालून दिलेल्या नियमांनुसार जातीचा दाखला काढण्याची प्रक्रिया स्पष्ट आहे, तरीही जरांगे पाटील घटनाबाह्य मागणी करत असल्याचे बारस्कर यांनी निदर्शनास आणले.
चार व्यक्तींचे जात वैधता प्रमाणपत्र रद्द झाल्यानंतर त्यांच्यासाठी राज्य सरकारने दाखले द्यावेत, ही जरांगे पाटील यांची मागणी कायद्याला धरून नाही. बारस्कर यांनी समाजाला आवाहन केले आहे की, जरांगे पाटील हे मराठा समाजाच्या कल्याणासाठी नव्हे, तर स्वतःच्या ब्रँडिंगसाठी आणि आर्थिक फायद्यासाठी आंदोलन करत आहेत. समाजातील लोकांनी त्यांच्या खोट्या आमिषांना बळी पडू नये, असा इशाराही त्यांनी दिला.
Leave a Reply