अभिजीत दीपके खरोखरच अरविंद केजरीवाल यांच्या आम आदमी पार्टीत काम करायचे की नाही? याची वारंवार चर्चा होत असते. आता या मुद्द्यावर पुन्हा एकदा अभिजीत दीपके यांनी थेट विधान केलं आहे. एका मुलाखतीत अभिजीत दीपके यांनी आपण आम आदमी पार्टीसोबत काम करत होतो आणि मला त्याचा अभिमान आहे, असं म्हटलं आहे. त्यामुळे दीपके यांच्या बाबतच्या उलटसुलट चर्चांना पूर्णविराम मिळाला आहे.
अभिजीत दीपके यांनी बीबीसीला दिलेल्या मुलाखतीत आपबाबतच्या संबंधावर प्रकाश टाकला आहे. तुम्ही आधी एका विरोधी पक्षाशी संबंधित होता. त्याचा वापर नेहमी तुमच्या विरोधात केला जाईल का? असा सवाल दीपके यांना विचारण्यात आला. त्यावर दीपके यांनी थेट प्रतिक्रिया दिली आहे. मला वाटतं ही एक इको सिस्टिम असेल. पुन्हा तुम्हाला त्याच त्याच ठिकाणी नेलं जाईल. तुम्ही आम आदमी पार्टीशी संबंधित होता हे वारंवार सांगितलं जाईल. आम आदमी पार्टी एक राजकीय पक्ष आहे. मी त्या पक्षात काम केलं आहे. मी तिथे प्रसिद्धीचं काम करत होतो. मी हे कुठेच लपवलेलं नाही. मी त्यावर बिनधास्तपणे बोललो आहे. मी आपमध्ये काम केल्याबद्दल मला अभिमानच आहे, असं दीपके म्हणाले.
तर त्यांनी खुशाल वापर करावा
मला शिक्षण आणि आरोग्यावर काम करण्याची संधी मिळाली. आता या गोष्टीचा वापर विरोधक माझ्यावर निशाणा साधण्यासाठी करत असतील तर त्यांनी खुशाल करावा. याचा अर्थ असा की मला टार्गेट करण्यासाठी त्यांना भूतकाळात गेल्याशिवाय पर्याय नाहीये, असं दीपके म्हणाले. बीबीसीमध्ये मे महिन्यात प्रकाशित झालेल्या रिपोर्टनुसार, अमेरिकेच्या बोस्टनला जाण्यापूर्वी दीपके हे आम आदमी पार्टीसोबत काम करत होते. त्यानंतर दीपकेंवर सातत्याने आप सोबत असल्याचा आरोप केला जात होता.
5 सप्टेंबरला आंदोलन नाही
दरम्यान, केंद्र सरकारकडून आश्वासनांची पूर्तता होत नसल्याच्या निषेधार्थ सीजेपीने दिल्लीच्या इंडिया गेटवर येत्या 5 सप्टेंबर रोजी आंदोलन करण्याचा इशारा दिला होता. जंतरमंतरवरील आंदोलनातील आंदोलकांवरील एफआयआर मागे घेण्यासाठी या आंदोलनाची हाक दिली होती. मात्र, काल सर्वोच्च न्यायालयाने विद्यार्थी आंदोलनातील देशभरातील एफआयआर रद्द करण्याचा निर्णय घेतला. सरन्यायाधीश सूर्यकांत यांनी कायद्याने दिलेल्या विशेष शक्तीचा वापर करत हा निर्णय दिला. त्यामुळे सीजेपीने कोर्टाचे आभार मानत 5 सप्टेंबरचं आंदोलन मागे घेत असल्याचं जाहीर केलं.
Leave a Reply