80 आणि 90 च्या दशकात हिंदी चित्रपटसृष्टीत आपल्या सौंदर्याने आणि अभिनयाने प्रेक्षकांच्या मनावर अधिराज्य गाजवणाऱ्या नीलम कोठारी यांचे वैयक्तिक आयुष्यही एखाद्या चित्रपटाच्या कथेसारखेच रंजक राहिले आहे. हाँगकाँगमध्ये वास्तव्यास असलेल्या नीलम यांचा चित्रपटसृष्टीत येण्याचा कोणताही विचार नव्हता.
मात्र, नियतीने त्यांना बॉलिवूडमध्ये आणले आणि त्यांनी अल्पावधीतच लोकप्रिय अभिनेत्री म्हणून स्वतःची वेगळी ओळख निर्माण केली. बॉलिवूडमध्ये पदार्पण करताच त्यांची जोडी गोविंदासोबत प्रचंड गाजली.
दोघांच्या चित्रपटांना प्रेक्षकांचा मोठा प्रतिसाद मिळाला आणि ही जोडी त्या काळातील सर्वाधिक लोकप्रिय ऑन-स्क्रीन जोड्यांपैकी एक ठरली. त्यांच्या नात्याबाबत अनेक अफवा पसरल्या होत्या, मात्र नीलम यांनी नेहमीच गोविंदा हे केवळ चांगले मित्र असल्याचे स्पष्ट केले.
यानंतर नीलम यांच्या आयुष्यात अभिनेता बॉबी देओलची एंट्री झाली. 1990 च्या दशकात दोघांच्या प्रेमसंबंधांची बरीच चर्चा झाली. जवळपास पाच वर्षे एकमेकांना डेट केल्यानंतर नीलम यांनी स्वतःहून हे नाते संपवण्याचा निर्णय घेतला. स्टार पत्नी म्हणून स्वतःची स्वतंत्र ओळख हरवण्याची भीती त्यांना वाटत होती. त्यामुळे त्यांनी हा कठीण निर्णय घेतल्याचे सांगितले जाते.
बॉबी देओल यांच्यापासून विभक्त झाल्यानंतर नीलम यांनी ब्रिटनमधील उद्योगपती ऋषी सेठिया यांच्याशी विवाह केला. लग्नानंतर त्यांनी ग्लॅमर विश्वाला रामराम ठोकत परदेशात नवे आयुष्य सुरू करण्याचा प्रयत्न केला. मात्र, काही काळानंतर त्यांना परदेशातील जीवनात एकटेपणा आणि घुसमट जाणवू लागली.
स्वतःची ओळख आणि स्वातंत्र्य गमावणे त्यांना मान्य नव्हते. अखेर हे वैवाहिक नाते टिकू शकले नाही आणि त्यांनी घटस्फोट घेण्याचा निर्णय घेतला. त्यानंतर नीलम भारतात परतल्या आणि नव्याने आयुष्याला सुरुवात केली.
Leave a Reply