Sukumari : आजच्या काळात एखाद्या अभिनेत्याने 100 किंवा 200 चित्रपटांमध्ये काम करणं म्हणजे मोठी कामगिरी मानली जाते. मात्र भारतीय चित्रपटसृष्टीत अशी एक दिग्गज अभिनेत्री होऊन गेली, जिने आपल्या कारकिर्दीत तब्बल 2500 हून अधिक चित्रपटांमध्ये काम केले. विशेष म्हणजे त्यांची कारकीर्द एक-दोन नाही तर तब्बल 6 दशकं चालली. ती अभिनेत्री म्हणजे सुकुमारी. भारतीय सिनेसृष्टीतील सर्वाधिक व्यस्त आणि बहुभाषिक अभिनेत्रींपैकी एक म्हणून त्यांचे नाव आजही आदराने घेतले जाते.
जर एखाद्या व्यक्तीने आजपासून सुकुमारी यांचे चित्रपट पाहण्यास सुरुवात केली आणि दररोज फक्त एक चित्रपट पाहिला तरी त्यांचे संपूर्ण चित्रपट पूर्ण पाहण्यासाठी जवळपास 6 वर्षे, 10 महिने आणि 20 दिवस लागतील. हीच बाब त्यांच्या प्रचंड मोठ्या कामगिरीची साक्ष देते.
बालवयात अभिनयात पदार्पण
सुकुमारी यांना लहानपणापासूनच अभिनय आणि शास्त्रीय नृत्याची आवड होती. केवळ दहा वर्षांच्या वयात त्यांनी ‘ओरू इरावु’ या तमिळ चित्रपटातून अभिनय क्षेत्रात पदार्पण केले. पहिल्याच चित्रपटानंतर त्यांनी मागे वळून पाहिले नाही आणि पुढे भारतीय चित्रपटसृष्टीतील सर्वाधिक चित्रपट करणाऱ्या अभिनेत्रींपैकी एक बनल्या.
सुकुमारी यांनी केवळ मल्याळम चित्रपटसृष्टीतच नाही तर तमिळ, तेलुगू, हिंदी, ओडिया आणि बंगाली चित्रपटांमध्येही आपली वेगळी ओळख निर्माण केली. त्यांच्या भूमिका केवळ आई किंवा बहिण अशा पारंपरिक चौकटीत अडकल्या नाहीत. त्या दमदार, स्पष्टवक्ती आणि भावपूर्ण भूमिकांसाठी विशेष ओळखल्या जात होत्या. ग्रामीण भागातील साध्या महिलांपासून आधुनिक विचारांच्या स्त्रियांपर्यंत अनेकविध भूमिका त्यांनी सहजतेने साकारल्या. त्यांच्या अभिनयातील नैसर्गिकता आणि प्रभावी संवादफेक यामुळे प्रेक्षक त्यांच्याशी पटकन जोडले जात.
2013 मध्ये निधन, पण वारसा आजही जिवंत
2013 मध्ये हृदयविकाराच्या झटक्यानंतर चेन्नईतील रुग्णालयात त्यांचे निधन झाले. मात्र त्यांच्या भूमिका, अभिनयशैली आणि विक्रमी कारकीर्द आजही भारतीय सिनेसृष्टीत विशेष मानली जाते. 2500 हून अधिक चित्रपटांमध्ये काम करणे ही केवळ संख्या नाही तर अभिनयावरील निष्ठा, मेहनत आणि कलेवरील अपार प्रेमाचे जिवंत उदाहरण आहे. त्यामुळेच सुकुमारी यांचे नाव भारतीय चित्रपटसृष्टीच्या इतिहासात कायम सुवर्णाक्षरांनी लिहिले जाईल.
Leave a Reply