90 च्या दशकात आपल्या सौंदर्य, ग्लॅमरस अंदाज आणि धाडसी व्यक्तिमत्त्वामुळे प्रेक्षकांच्या मनावर राज्य करणाऱ्या अभिनेत्रींपैकी एक म्हणजे सोनम खान.
आपल्या अभिनयासोबतच हटके फॅशन आणि बोल्ड अंदाजामुळे तिला त्या काळातील ‘फॅशन आयकॉन’ म्हणूनही ओळखलं जात होतं. सध्या सोनम खान रुपेरी पडद्यापासून दूर असली तरी सोशल मीडियाच्या माध्यमातून ती चाहत्यांच्या संपर्कात असते.
सोनम खानने ‘आखिरी अदालत’, ‘सच्चाई की ताकत’सह अनेक चित्रपटांमध्ये काम केलं. मात्र ‘त्रिदेव’ या चित्रपटातील ‘ओए ओए… तिरछी टोपी वाले’ या गाण्यामुळे सोनम रातोरात लोकप्रिय झाली. त्या काळात श्रीदेवी आणि माधुरी दीक्षित यांसारख्या आघाडीच्या अभिनेत्रींच्या यादीतही तिचं नाव घेतलं जात होतं.
करिअरच्या शिखरावर असतानाच 1991 मध्ये वयाच्या अवघ्या 19 व्या वर्षी सोनमने दिग्दर्शक राजीव राय यांच्याशी लग्न केलं. राजीव राय यांनी ‘त्रिदेव’ आणि ‘विश्वात्मा’ यांसारख्या चित्रपटांचं दिग्दर्शन केलं होतं. लग्नानंतर सोनमने अभिनयापासून काही प्रमाणात अंतर घेतलं. या दाम्पत्याला गौरव हा मुलगा झाला.
एकेकाळी आपल्या ग्लॅमरस आणि बिनधास्त अंदाजाने हिंदी चित्रपटसृष्टी गाजवणारी सोनम खान आज पडद्यापासून दूर असली, तरी आज वाढदिवसानिमित्त तिच्या जुन्या चित्रपटांतील भूमिका आणि गाणी पुन्हा एकदा चर्चेत आली आहेत.
Leave a Reply