अभिनेत्री मेधा मांजरेकर यांनी काही दिवसांपूर्वी सोशल मीडियावर एक भावूक पोस्ट करत कॅन्सर झाल्याचं चाहत्यांना सांगितलं. त्यानंतर त्यांच्या असंख्य चाहत्यांनी चिंता व्यक्त केलं. मेधा यांनी कोणालाच काहीच कल्पना नसताना कॅन्सरची पोस्ट केल्याने चाहत्यांना देखील मोठा धक्का बसला. दरम्यान, नुकताच झालेल्या एका मुलाखतीत मेधा यांनी कॅन्सरवरील उपचार, टेस्ट यांबद्दल खुलासा केला आहे. शिवाय माझ्या आईला देखील कॅन्सर झालेला, महेशला कॅन्सर झालेला आणि ते बरे देखील. मी देखील बरी होणार… असं देखील मेधा मुलाखतीत म्हणाल्या.
सोशल मीडियावर शेअर केलेल्या पोस्टबद्दल मेधा मांजरेकर म्हणाल्या, ‘ती पोस्ट खरं तर मी लोकांचे आभार मानण्यासाठी केलेली. गेल्या आठ महिन्यांपासून माझा प्रवास सुरु आहे. माझ्या घरात आईला कॅन्सर झालेलं मी पाहिलं आहे. महेशला देखील कॅन्सर झालेला आणि ते बरे देखील झाले. कॅन्सर झालेली मी पहिलीच नाही. अनेकांना कॅन्सर झाला आहे.’
‘जेव्हा मला कळलं की कॅन्सर झाला आहे, तेव्हा मला खरंच भीती वाटली नाही. कारण आता सायन्स पुढे गेलं आहे. चांगले उपचार आहे. किमोथेरपी देखील बऱ्यापैकी सोपी झाली आहे. थेरपी दरम्यान त्रास होतोच पण तुलनेने गोष्टी आता सहज सोप्या झाल्या आहेत.’
कॅन्सरचं निदान कधी झालं?
यावर मेधा यांनी मोठा किस्सा सांगितला. ‘मी एक ट्रिप प्लॅन केलेली. मला असं वाटलं की टेस्ट करायच्याच आहेत, तर आधी फिरुन येते. त्यानंतर टेस्ट करायला जाईल. त्यामुळे मी म्हटलं 10 दिवसांनीच टेस्ट करेल, त्यामुळे मी ट्रिपला गेले आणि फिरुन आल्यानंतर टेस्ट पूर्ण केल्या. त्यानंतर हा प्रवास सुरु झाला.’
‘ही टेस्ट मी स्वतःच जाऊन करुन आली, तेव्हा कळलं आणखी टेस्ट कराव्या लागतील. त्यानंतर घरी आल्यावर मी महेशला माझ्या कॅन्सरबद्दल सांगितलं. महेश खूप पॉझिटिव्ह आहे. त्याच्या कॅन्सरच्यावेळी देखील तो असाच पॉझिटिव्ह होता… माझी आई देखील बरी झाली आहे आणि मी देखील बरी होईल…’
‘माझा कॅन्सर जेनेटिक आहे. कारण आईला कॅन्सर झालेला. त्याला आता कोण काय करणार. काही गोष्टी स्वीकारणं आणि पुढे जाणं… त्यातून कसं बाहेर येता येईल हे पाहणं… जे हातात आहे ते करायचं आणि जे नाही ते स्वीकारायचं… कॅन्सर म्हटलं की आपण घाबरुन जातो. पण मी सगळ्यांना एकच सांगेल की, घाबरु नका… कारण आता चांगले उपचार आहेत. लढा तर द्यावाच लागणार कारण कॅन्सरपेक्षा उपचार अधिक वेदनादायी आहे… पण ठरवलं की सगळं होतं….’ असं देखील मेधा म्हणाल्या.
Leave a Reply