उत्तर प्रदेशच्या गाझियाबादमधून मोठी बातमी समोर आली आहे. गाझियाबादमध्ये पोलीस आणि आरोपीमध्ये पुन्हा एकदा चकमक झाली. हत्या प्रकरणी अटकेत असलेला आरोपीने शस्त्र जप्तीच्या कारवाईदरम्यान पळून जाण्याचा प्रयत्न केला. पोलिसांच्या तावडीतून पळून जाताना त्याने गोळीबार केला. आरोपीच्या गोळीबारानंतर प्रत्युत्तर म्हणून पोलिसांनीही गोळीबार केला. पोलिसांनी केलेल्या गोळीबारात आरोपीच्या पायाला गोळी लागली.
पोलिसांच्या माहितीनुसार, गाझियाबादमधील क्रॉसिंग रिपल्बिक पोलीस स्टेशनमध्ये 2 जुलै रोजी मोहित शर्माच्या हत्येचा गुन्हा नोंदवण्यात आला. या हत्या प्रकरणी पोलिसांनी मुख्य आरोपी गौरव आणि त्याचा साथीदारावर नजर ठेवली होती. त्यानंतर पोलिसांनी 3 जुलै रोजी मुख्य आरोपी गौरवला ताब्यात घेतलं. गाझियाबाद पोलिसांचा दावा आहे की, हत्या प्रकरणातील आरोपीला शस्त्र जप्तीसाठी शांतीनगर येथील वॉटर प्लांट येथील डंपिंग यार्डात नेण्यात येत होते. त्याचवेळी आरोपी पोलिसांना चकमा देऊन पळण्याच्या तयारीत होता.
…अन् आरोपी झुडपात लपला
पोलिसांनी पुढे सांगितलं की, आरोपीने पोलिसांना चकमा देऊ पळ काढला. त्यानंतर जवळील झुडपात लपला. त्यानंतर त्याच्याजवळील गावठी पिस्तुलने पोलीस पथकावर गोळीबार केला. त्यानंतर पोलिसांनी आत्मसंरक्षणासाठी प्रत्युत्तर म्हणून गोळीबार केला. या गोळीबारात आरोपीच्या पायाला गोळी लागली. आरोपी गोळीबारात जखमी झाल्यानंतर झुडपात पडला. त्यानंतर पोलिसांनी पुन्हा आरोपीला ताब्यात घेतलं. पोलिसांनी आरोपीला ताब्यात घेऊन उपचारासाठी रुग्णालयात दाखल केले. सध्या आरोपीची प्रकृती स्थिर असल्याचे पोलिसांनी सांगितले. आता पोलिसांनी या प्रकरणी पुढील तपास सुरू केला आहे. पोलिसांकडून इतर संशयित आरोपींचा तपास सुरू आहे.
उत्तर प्रदेशमध्ये दिवसाढवळ्या गोळीबार
उत्तर प्रदेशच्या बरौत गावात सायंकाळच्या सुमारास तंबू व्यापारी आणि त्याच्या मुलाची गोळ्या झाडून हत्या करण्यात आली. दोघांची हत्या झाल्याने स्थानिक व्यापाऱ्यांकडून संताप व्यक्त केला जात आहे. दोघे 3 आठवड्यापूर्वी सायंकाळी दुकानात बसले होते, त्यावेळी दोन अज्ञात हल्लेखोरांनी दोघांवर जवळून गोळीबार केला. दोघांवर गँगस्टर वरुण लोहारी याने हल्ला केल्याचा आरोप करण्यात येत आहे. या घटनेने नागरिकांमध्ये भीतीचं वातावरण निर्माण झालं आहे.
Leave a Reply