हिंदी चित्रपटसृष्टीच्या सुवर्णकाळातील पहिली ‘ब्यूटी क्वीन’ आणि ‘ड्रीमगर्ल’ म्हणून ओळखल्या जाणाऱ्या नसीम बानू 1940 च्या दशकात आपल्या अप्रतिम सौंदर्याने आणि प्रभावी अभिनयाने प्रेक्षकांच्या मनावर अधिराज्य गाजवत होत्या. त्या त्या काळातील सर्वात लोकप्रिय अभिनेत्रींपैकी एक होत्या.
प्रसिद्ध अभिनेत्री सायरा बानो यांच्या त्या आई तर ज्येष्ठ अभिनेते दीलिप कुमार यांच्या सासूबाई होत्या. 4 जुलै 1916 रोजी जुन्या दिल्लीत त्यांचा जन्म झाला. त्यांचे मूळ नाव रोशन आरा बेगम होते. त्या इतक्या सुंदर होत्या की त्यांना लोकांच्या नजरेपासून दूर ठेवण्यासाठी अनेकदा पडद्याआड ठेवले जात असे.
बालपणी आईसोबत मुंबईला आल्यावर त्यांनी एका चित्रपटाचे चित्रीकरण पाहिले आणि अभिनेत्री होण्याचा निर्धार केला. सुरुवातीला कुटुंबीयांचा विरोध असला तरी त्यांनी आपल्या स्वप्नाचा पाठपुरावा केला.
1935 मध्ये दिग्दर्शक सोहराब मोदी यांच्या 'खून का खून' या चित्रपटातून त्यांनी रुपेरी पडद्यावर पदार्पण केले. या चित्रपटाच्या यशानंतर त्यांना मोठी लोकप्रियता मिळाली आणि त्या निर्मात्यांची पहिली पसंती बनल्या. त्यानंतर त्यांनी शिक्षण अर्धवट सोडून पूर्णवेळ चित्रपटसृष्टीत काम करण्यास सुरुवात केली.
विशेषतः ‘पुकार’ चित्रपटातील राणी नूरजहाँची भूमिका त्यांच्या कारकिर्दीतील मैलाचा दगड ठरली. या भूमिकेचा प्रभाव इतका होता की प्रेक्षक चित्रपटगृहात प्रवेश करताना चपल बाहेर काढून जात असल्याच्या कथा आजही सांगितल्या जातात.
Leave a Reply