बॉलिवूडचे महानायक अमिताभ बच्चन यांनी आपल्या प्रदीर्घ कारकिर्दीत अनेक गाजलेल्या चित्रपटांमध्ये काम केले. त्यांच्या चित्रपटांइतकीच त्यातील गाणीही लोकप्रिय ठरली. त्यापैकी 1977 मध्ये प्रदर्शित झालेल्या 'अमर अकबर अँथनी' या सुपरहिट चित्रपटातील 'माय नेम इज अँथनी गोंसाल्व्हस' हे गाणं आजही प्रेक्षकांच्या आवडीचे आहे.
मात्र या गाण्याशी संबंधित एक रंजक किस्सा स्वतः अमिताभ बच्चन यांनी सांगितला होता. मनमोहन देसाई दिग्दर्शित आणि निर्मित 'अमर अकबर अँथनी' या चित्रपटाची कथा कादर खान यांनी लिहिली होती. चित्रपटातील बहुतांश गाणी किशोर कुमार, मोहम्मद रफी आणि लता मंगेशकर यांनी गायली आहेत.
'माय नेम इज अँथनी गोंसाल्व्हस' या गाण्यात किशोर कुमार यांच्यासोबत अमिताभ बच्चन यांनीही आवाज दिला आहे. गाण्याच्या सुरुवातीला अमिताभ बच्चन एक अवघड इंग्रजी वाक्य बोलताना दिसतात. चित्रपटातील अँथनी हे पात्र स्वतःला इंग्रजीचे मोठे ज्ञान असल्याचा आव आणत असते, पण प्रत्यक्षात त्याला इंग्रजी नीट येत नसते. त्यामुळे मुद्दाम चुकीच्या आणि अतिशयोक्तीपूर्ण शैलीत हा संवाद बोलण्यात आला होता.
अमिताभ बच्चन यांनी त्यांच्या ब्लॉगमध्ये सांगितले होते की, हा संवाद बोलण्यापूर्वी त्यांनी मनमोहन देसाई यांची परवानगी घेतली होती. त्यावेळी त्यांनी केवळ विनोदी परिणाम साधण्यासाठी शब्दांची जुळवाजुळव केली होती. मात्र अनेक वर्षांनंतर त्यांच्या टीमने शोध घेतला असता हा संवाद 1878 मध्ये ब्रिटनचे तत्कालीन पंतप्रधान बेंजामिन डिझरेली यांनी संसदेत केलेल्या भाषणाशी बऱ्याच अंशी मिळताजुळता असल्याचे समोर आले.
फरक इतकाच की मूळ भाषणात 'intoxicated' ऐवजी 'inebriated' हा शब्द वापरण्यात आला होता. ही बाब समजल्यानंतर अमिताभ बच्चन यांनाही मोठा धक्का बसला होता. चित्रपटाच्या चित्रीकरणावेळी आपण हे शब्द केवळ विनोदी शैलीत उच्चारले होते, त्यामागे कोणताही विशेष हेतू नव्हता, असे अमिताभ बच्चन यांनी नमूद केले. त्यामुळे या गाण्यामागचा हा रंजक किस्सा आजही चाहत्यांमध्ये चर्चेचा विषय ठरतो.
Leave a Reply