Uddhav Thackeray on Vidharbha Tour: सहा खासदारांनी पक्षाला अखेरचा जय महाराष्ट्र केल्यानंतर पक्ष प्रमुख उद्धव ठाकरे यांचा झंझावाती दौरा होणार असल्याचे टीझरवरून समोर आले आहे. फितूरांच्या फितुरीवर पलटवार करण्यात येणार आहे. या दौऱ्यापूर्वीच नागपूर विमान प्रवासात महानाट्य घडले. मुख्यमंत्री देवेंद्र फडणवीस, उद्धव ठाकरे आणि आमदार ठाकरे या तिघांनी एकत्र विमान प्रवास केला. त्यांच्यात हितगुज झाले. त्यामुळे राजकारणात खळबळ उडाली आहे. त्याचवेळी आजपासून उद्धव ठाकरे हे फुटीर खासदारांच्या मतदारसंघात जनतेशी संवाद साधत फंदफितुरीला सडेतोड उत्तर देणार आहे. विदर्भातील वाशिम-यवतमाळपासून या दौऱ्याला सुरुवात होत आहे.
आता पलटवार होणार
आता पलटवार होणार, फितूरांच्या फितूरीला उत्तर देणार, निष्ठेची ताकद पुन्हा दाखवणार, आशा आशयाचा उद्धव ठाकरे यांच्या दौऱ्याचा टिजर सध्या चर्चेत आला आहे. या एकाच टिजरमधून उद्धव ठाकरे यांनी अनेक इशारे दिले आहेत. उद्धव ठाकरे यांचा आजपासून दौरा सुरु होत असून त्याचा टिजर आज जारी करण्यात आला आहे. ठाकरे यांनी बंडखोर खासदारांविरोधात शंखनाद केला आहे. या नवीन टिझरमुळे शिवसैनिकांमध्ये चैतन्य संचारले आहे.
फुटीर खासदारांच्या मतदार संघात हा दौरा असणार आहे. मला माझ्या सोबत अन्यायावर वार करणारे सैनिक पाहिजेत पाठीत वार करणारे नकोत. मी खचणारा नाही अशी अनेक संकट आली मी पळणारा नाही पाहडासारखा उभा राहीन, असा खणखणीत इशारा उद्धव ठाकरे यांनी दिला आहे. शिवसेनेचा ढाण्या वाघ मैदानात उतरल्याने कार्यकर्ते, पदाधिकारी ही पाय रोवून उभे ठाकले आहे. या दौऱ्यामुळे पक्षाची बांधणी अधिक मजबूत होण्याची शक्यता आहे.
आज उद्धव ठाकरे कॅप्टनच्या मतदारसंघात
ऑपरेशन टायगरमध्ये सहा फुटीर खासदारांचे कॅप्टन संजय देशमुख असल्याचा आरोप नेत्या सुषमा अंधारे यांनी केला होता. या बंडाचे दुसरे उपकर्णधार नागेश आष्टीकर पाटील असल्याचा दावा त्यांनी केला होता. हे दोन्ही मतदारसंघ जवळ जवळ आहेत. आजपासून उद्धव ठाकरे यांचा वाशिम-यवतमाळ मतदारसंघात संवाद दौरा आहे. या दौऱ्यासाठी जय्यत तयारी करण्यात आली आहे.
शिवसेना (उद्धव बाळासाहेब ठाकरे) पक्षातील सहा खासदारांनी शिंदे यांच्या शिवसेनेत प्रवेश केल्यानंतर पक्षप्रमुख उद्धव ठाकरे यांचा आज वाशिम-यवतमाळ मतदारसंघात दौरा होत आहे. शिंदे यांच्या शिवसेनेत प्रवेश केलेले बंडखोर खासदार संजय देशमुख यांच्या मतदारसंघातील उद्धव ठाकरे यांचा दौऱ्याला आज पासून सुरुवात होत आहे. सकाळी यवतमाळ येथे पदाधिकारी व कार्यकर्त्यांच्या संवाद मेळाव्याने दौऱ्याची सुरुवात करणार आहेत. दुपारी २ नंतर वाशिमच्या जैन भवनात पदाधिकारी व कार्यकर्त्यांचा संवाद मेळावा होईल.
पक्षांतरानंतर प्रथमच यवतमाळ–वाशिम लोकसभा मतदारसंघातील पदाधिकारी व कार्यकर्त्यांशी उद्धव ठाकरे थेट संवाद साधणार आहेत. या दौऱ्यात त्यांच्यासोबत आमदार आदित्य ठाकरे, खासदार संजय राऊत आणि इतर नेते असतील. या दौऱ्यात उद्धव ठाकरे हे पक्ष संघटना अधिक मजबूत करण्याबरोबरच कार्यकर्त्यांचे मनोबल वाढविण्यावर भर असणार आहे. शिंदे यांच्या शिवसेनेत प्रवेश केलेल्या खासदार संजय देशमुख यांच्या पक्षांतराचा समाचार घेत पक्षाची भूमिका मांडणार आहेत. या मेळाव्यास आदित्य ठाकरे संजय राऊत अरविंद सावंत यांच्यासह पक्षाचे वरिष्ठ नेते उपस्थित राहतील. बंडखोर खासदाराच्या मतदारसंघातूनच संघटनात्मक पुनर्बांधणी आणि राजकीय ताकद दाखवण्याचा प्रयत्न करतील.
ओमराजे निंबाळकर यांच्या मतदारसंघात उद्या एल्गार
खासदारांच्या पक्षांतरनंतर उद्धव बाळासाहेब ठाकरे शिवसेनेने जिल्हाभर संघटनात्मक हालचालींना वेग दिला आहे. “मी खंबीर आहे, मी कुठेही जाणार नाही. धाराशिव हा मातोश्रीशी नाळ जुळलेला आणि बाळासाहेब ठाकरे यांच्या विचारांवर चालणारा जिल्हा आहे. असं मत कैलास पाटील यांनी व्यक्त केले आहे. येथील शिवसैनिक कुठल्याही एका व्यक्तीच्या मागे नसून पक्ष आणि विचारांच्या पाठीशी ठामपणे उभा आहे.” अशी प्रतिक्रिया आमदार कैलास पाटील यांनी दिली.
धाराशिव जिल्हा हा शिवसेनेचा बालेकिल्ला असल्याचा पुनरुच्चार करत त्यांनी कार्यकर्त्यांना संघटन मजबूत करण्याचे आवाहन केले.दरम्यान, जिल्ह्यात उद्धव बाळासाहेब ठाकरे शिवसेनेच्या बैठका सुरू असून, उद्या धाराशिव येथे पक्षप्रमुख उद्धव ठाकरे यांची जाहीर सभा होणार आहे.
Leave a Reply