Toxic Box Office Collection: रॉकिंग स्टार यशचा बहुचर्चित आणि बहुप्रतिक्षित ‘टॉक्सिक’ हा चित्रपट अखेर 26 ऑगस्ट 2026 रोजी थिएटर्समध्ये प्रदर्शित झाला. पहिल्याच दिवशी या चित्रपटाने रेकॉर्डब्रेक कमाई केली आहे. गीतू मोहनदासच्या या चित्रपटाने प्रदर्शनाच्या पहिल्या दिवशी 100 कोटी रुपयांचा टप्पा ओलांडून बॉक्स ऑफिसवर इतिहास रचला आहे. तर जगभरातील कमाईचा आकडा तब्बल 140 कोटी रुपयांवर पोहोचला आहे. ‘केजीएफ 2’नंतर चार वर्षांनी यशने मोठ्या पडद्यावर पुनरागमन केलं आहे. ‘टॉक्सिक’ने पहिल्याच दिवशी ‘जवान’ आणि ‘धुरंधर’सारख्या चित्रपटांना मागे टाकत देशातील सर्वाधिक कमाई करणारा चित्रपट बनण्याचा मान मिळवला आहे. या चित्रपटाचं बजेट 500 कोटी रुपये असल्याचं कळतंय.
‘सॅकनिल्क’च्या सुरुवातीच्या आकडेवारीनुसार, ‘टॉक्सिक’ने भारतात पहिल्याच दिवशी सुमारे 101 कोटी रुपयांची नेट कमाई केली आहे. तर जगभरातील कलेक्शनचा आकडा तब्बल 140 कोटी रुपयांच्या आसपास पोहोचल्याचं वृत्त आहे. विशेष म्हणजे, ‘टॉक्सिक’ला हिंदीसह कन्नड, तमिळ, तेलुगू आणि मल्याळम अशा विविध भाषांमध्ये रिलीज करण्यात आलं आहे. त्यामुळे पॅन-इंडिया प्रेक्षकांचा मोठा फायदा चित्रपटाला मिळाला. हिंदी भाषेतील कमाईनेही चित्रपटाच्या एकूण व्यवसायात महत्त्वाची भूमिका बजावली आहे.
‘जवान’ आणि ‘धुरंधर’ला टाकलं मागे
यशच्या ‘टॉक्सिक’ने पहिल्या दिवसाच्या कमाईत शाहरुख खानच्या ‘जवान’ आणि रणवीर सिंहच्या ‘धुरंधर’च्या ओपनिंगच्या तुलनेत दमदार कामगिरी केली आहे. भारतातील पहिल्या दिवसाच्या कलेक्शनमध्ये ‘टॉक्सिक’ने 100 कोटींचा टप्पा पार केला असून त्याची सुरुवात ऐतिहासिक ठरली आहे.
रिलीजपूर्वीच तिकीट विक्रीचा विक्रम
‘टॉक्सिक’ची क्रेझ रिलीजच्या आधीपासूनच पाहायला मिळत होती. अॅडव्हान्स बुकिंगमध्ये तब्बल 9 लाखांहून अधिक तिकिटांची विक्री झाली होती आणि प्री-सेल्समधून 41 कोटी रुपयांपेक्षा जास्त कमाई झाल्याचं वृत्त होतं. देशातील अनेक शहरांमध्ये पहाटेपासूनचे शोदेखील हाऊसफुल्ल होत होते.
गीतू मोहनदास दिग्दर्शित या चित्रपटात यशसोबत कियारा अडवाणी, नयनतारा, हुमा कुरेशी, तारा सुतारिया आणि रुक्मिणी वसंत यांच्या प्रमुख भूमिका आहेत. हा एक पीरियड अॅक्शन-क्राइम थ्रिलर असून गोव्याच्या पार्श्वभूमीवर सत्तासंघर्ष, हिंसा आणि विश्वासघाताची कथा मांडण्यात आली आहे. सिनेमाला समीक्षकांकडून संमिश्र प्रतिक्रिया मिळत असल्या तरी बॉक्स ऑफिसवर यशची स्टारपॉवर स्पष्टपणे दिसून येत आहे. आता वीकेंडला ‘टॉक्सिक’ची कमाई किती वेगाने वाढते आणि हा चित्रपट 2026 मधील सर्वात मोठ्या ब्लॉकबस्टरच्या शर्यतीत किती पुढे जातो, याकडे सर्वांचं लक्ष लागलं आहे.
Leave a Reply