Sonu Nigam: हिंदूंची किती परीक्षा घेणार.. क्रिती सनॉनच्या रक्षाबंधनच्या जाहिरातीवरून भडकला सोनू निगम? सत्य काय?

अभिनेत्री क्रिती सनॉनच्या रक्षाबंधनाच्या जाहिरातीवरून सुरू झालेला वाद आता एका वेगळ्याच कारणामुळे चर्चेत आला आहे. या जाहिरातीवर गायक सोनू निगमने तीव्र प्रतिक्रिया दिल्याचा दावा सोशल मीडियावर व्हायरल झाला होता. मात्र, या पोस्टशी आपला काहीही संबंध नसल्याचं खुद्द सोनू निगमने स्पष्ट केलं आहे. त्यामुळे क्रितीच्या जाहिरातीवरील वादासोबतच फेक सोशल मीडिया अकाउंट आणि चुकीच्या नावाने पसरवण्यात आलेल्या वक्तव्याचा मुद्दाही समोर आला आहे. सोशल मीडियावर ‘Sonu Nigam Singh’ नावाच्या X अकाउंटवरून क्रिती सनॉनच्या जाहिरातीबाबत एक पोस्ट करण्यात आली होती. या पोस्टमध्ये जाहिरातीचा मुद्दा केवळ महिलांच्या कपड्यांशी संबंधित नसून हिंदू सण आणि परंपरांशी संबंधित असल्याचं म्हटलं होतं. ही पोस्ट प्रसिद्ध गायक सोनू निगमचीच असल्याचा अनेकांनी समज करून घेतला. मात्र, हा दावा चुकीचा असल्याचं सोनू निगमने स्पष्ट केलं.

पोस्टमध्ये काय लिहिलंय?

‘हा वाद महिला काय परिधान करते याबद्दल अजिबात नाही. समस्या आहे ती दुटप्पीपणाची आणि हिंदू सणांच्या परंपरांचा वापर करून लोकांना प्रभावित करण्याच्या युक्तीची. कारण क्रिती सनॉनने अशा प्रकारचे कपडे पहिल्यांदाच घातले आहेत आणि त्यामुळे वाद निर्माण झाला आहे, असं नाही. कधी, कुठे आणि काय परिधान करावं याबाबत एक विशिष्ट शिष्टाचार असतो. उदाहरणार्थ, गुरुद्वारात प्रवेश करताना डोकं झाकण्याची परंपरा आहे, तर मंदिरात साधे, पूर्ण अंग झाकणारे आणि सभ्य कपडे परिधान केले जातात. अनेक मंदिरांमध्ये पुरुषांनाही हाफ पँट घालण्यास मनाई असते. मात्र, तिथे कोणीही ‘आपल्याला हवे ते कपडे घालण्याचं स्वातंत्र्य आहे’ असा गाजावाजा करत नाही. त्यामुळे लोकशाही देशात हिंदूंच्या श्रद्धेला वारंवार धक्का देण्याचा प्रयत्न थांबवा. हिंदू सहिष्णू आहेत, याचा अर्थ असा नाही की तुम्ही वारंवार त्यांच्या संयमाची परीक्षा घेत राहावी. ‘जिवा’ने हा जाहिरातीचा व्हिडीओ हटवला आहे आणि त्यासाठी धन्यवाद,’ अशी पोस्ट या अकाऊंटवरून करण्यात आली आहे.

विवाद ये कतई नहीं है कि महिला क्या पहनें… दिक्कत दोगलेपन से है और हिंदू त्योहारों पर लोगों को उनकी परंपराओं से प्रभावित करने वाले हथकंडों से है।

क्योंकि ऐसा नहीं है कि कृति सेनन ने कोई पहली बार कुछ ऐसा पहना है और विवाद हो गया।

कब क्या पहनना चाहिए इसका एक सलीका होता है। उदाहरण… pic.twitter.com/7KwZprdL6w

— Sonu Nigam (@SonuNigamSingh) August 26, 2026

व्हायरल झालेल्या बातमीचा स्क्रीनशॉट इन्स्टाग्रामवर शेअर करत सोनू निगमने स्पष्ट शब्दांत सांगितलं की, हे वक्तव्य त्याने केलेलं नाही. संबंधित X अकाउंटही त्याचं नसल्याचं सोनूने स्पष्ट केलं. सोनू निगमचं X या प्लॅटफॉर्मवर कोणतंच अकाऊंट नाही. प्रत्यक्षात समान नावाच्या दुसऱ्या व्यक्तीच्या अकाउंटवरील पोस्टमुळे हा गैरसमज निर्माण झाला.

Source link