Snakes In Home : साप अचानक घरात येत नाहीत ! किचनमधील या 6 चुका ठरू शकतात धोकादायक

Snakes In Home : पावसाळा असो किंवा उन्हाळा, घराच्या आसपास साप दिसण्याच्या घटना वाढतात. अनेकांना वाटते की साप अचानक घरात शिरतात. पण अनेकदा त्यामागे एक कारण असते—घराच्या आसपास उंदीर, कीटक आणि छोटे जीव असणे. थेट अन्नाच्या वासाने साप घरात येत नाहीत. मात्र स्वयंपाकघरात अशा काही गोष्टी असतात, ज्या उघड्या ठेवल्यामुळे किंवा अस्वच्छता असल्यामुळे उंदीर आणि कीटक आकर्षित होतात. आणि जिथे त्यांचं भक्ष्य असतं, तिथेच सापही येण्याची शक्यता वाढते. म्हणूनच घरात साप यायला नको असतील, तर तुम्हीही या चुका टाळा. अशा काही वस्तू किचनमध्ये असतील तर त्या लगेच काढून टाका.

1. धान्य आणि डाळी उघड्या ठेवू नका

तांदूळ, गहू, डाळी किंवा इतर धान्य उघड्या पिशव्यांमध्ये ठेवल्यास उंदीर आणि कीटक घरात येऊ शकतात. उंदीर हे सापांचे भक्ष्य असल्याने साप येण्याची शक्यता वाढू शकते. त्यामुळे धान्य नेहमी हवाबंद डब्यांमध्ये ठेवा आणि ज्या ठिकाणी धान्य ठेवता ती जागा स्वच्छ ठेवा.

2. भाज्यांच्या साली आणि उरलेलं अन्न साठवू नका

भाज्यांच्या साली, उरलेले अन्न किंवा ओला कचरा बराच वेळ घरात पडून राहिल्यास माश्या, कीटक आणि उंदीर आकर्षित होतात. यामुळे सापही त्या परिसरात येऊ शकतात. म्हणूनच ओला कचरा दररोज बाहेर टाका आणि कचरापेटी नेहमी झाकून ठेवा.

3. दूध, अंडी आणि पनीर उघडं ठेवू नका

दूध, पनीर, अंडी किंवा इतर पदार्थ उघडे राहिल्यास ते खराब होऊ शकतात. त्यातून येणारा वास कीटक आणि उंदरांना आकर्षित करू शकतो. ते लगेचच तुमच्या कीचनमध्ये येऊ शकतात. त्यामुळे उंदीर टाळायचे असतील तर अन्नपदार्थ नेहमी झाकून किंवा फ्रिजमध्ये ठेवा आणि खराब झालेले पदार्थ लगेच फेकून द्या.

4. मांस आणि माशांचा कचरा लगेच बाहेर टाका

मांस किंवा माशांचे उरलेले तुकडे लवकर खराब होतात आणि दुर्गंधी निर्माण करतात. त्यामुळे कीटक आणि उंदीर घरात येऊ शकतात. असा कचरा लगेच घराबाहेर टाका आणि कचरापेटी व्यवस्थित बंद ठेवा.

5. पाळीव प्राण्यांचं खाद्य उघडं ठेवू नका

कुत्रे, मांजरी किंवा पक्ष्यांसाठी ठेवलेले खाद्य उघडे राहिल्यास उंदीर आणि इतर छोटे जीव त्याकडे आकर्षित होऊ शकतात. पर्यायाने त्यांच्या शोधात सापही घरापर्यंत पोहोचू शकतात. त्यामुळे तुमच्याकडे जर पाळीव प्राणी असतील तर त्यांचं खाण-पिणं हे एखाद्या डब्यात नीट बंद करून योग्य जागी ठेवा. उघड्यावर ठेवणं टाळा.

6. सिंकखाली पाणी साचू देऊ नका

सिंकखाली पाणी साचणं, पाइपमधून गळती होणं किंवा घरात सतत ओलावा असणं, यामुळे थोडा गारवा निर्माण होतो, आणि अशीचा जागा सांपाना लपण्यासाठी आवडू शकते. हे टाळण्यासाठी सिंकखालील जागा नेहमी कोरडी ठेवा आणि पाइप गळत असेल तर वेळीच दुरुस्त करा.

सापांपासून घर सुरक्षित ठेवायचं असेल तर हे नक्की करा

स्वयंपाकघर नेहमी स्वच्छ ठेवा.

धान्य आणि अन्नपदार्थ बंद डब्यांमध्ये ठेवा.

उंदरांची समस्या दिसताच त्यावर उपाय करा.

स्टोअररूममध्ये अनावश्यक सामान साचू देऊ नका.

भिंती, पाइप आणि दरवाज्याजवळील भेगा बंद करा.

घराभोवती झाडाझुडपं, लांब गवत आणि कचरा साचू देऊ नका.

Source link