Sharad Pawar Meeting : गेल्या काही दिवसांपासून राज्याच्या राजकारणात मोठ्या घडामोडी घडत आहेत. शरद पवार यांचा पक्ष एनडीएमध्ये सामील होऊ शकतो, असा दावा केला जातोय. हा दावा पवार गटाच्या बड्या नेत्यांनी फेटाळलेला आहे. परंतु पडद्यामागे घडलेल्या काही घडामोडींमुळे या शक्यतेबाबत अधूनमधून चर्चेला उधाण येत आहे. दरम्यान, आता दिल्लीमध्ये शरद पवार यांच्या पक्षाच्या खासदारांची एक महत्त्वाची बैठक पार पडली. या बैठकीत अनेक महत्त्वाच्या विषयांवर चर्चा करण्यात आली.
दिल्लीत बैठक, कोण कोण उपस्थित
सूत्रांच्या माहितीनुसार दिल्लीमध्ये शरद पवार यांच्या पक्षाच्या खासदारांची एक बैठक पार पडली. या बैठकीला शरद पवार हेदेखील उपस्थित होते. बैठकीचे नेमके कारण समजू शकलेले नव्हते. परंतु बैठक पार पडल्यानंतर खासदारांनी बैठक का झाली, त्याचे कारण काय होते? याबाबत माहिती दिली. या बैठकीस शरद पवार यांच्यासह खासदार अमोल कोल्हे तसेच इतर खासदार हजर होते.
याआधी खासदार आणि मोदी यांच्यात बैठक
काही दिवसांपूर्वी शरद पवार यांच्या खासदारांनी पंतप्रधान नरेंद्र मोदी यांची भेट घेतली होती. या भेटीत वेगवेगळ्या विषयांवर चर्चा झाली होती. ही बैठक तेव्हा चांगलाच चर्चेचा मुद्दा ठरली. विशेष म्हणजे मोदी आणि राष्ट्रवादींच्या खासदारांची भेट झाल्यानंतर आता याच खासदारांची शरद पवार यांच्या उपस्थितीत बैठक पार पडली. त्यामुळे आजच्या या बैठकीला विशेष महत्त्व आले आहे.
बैठकीचं कारण काय? कोणत्या विषयांवर चर्चा?
दरम्यान, ही बैठक संपल्यानंतर खासदार अमोल कोल्हे यांनी प्रतिक्रिया दिली. मतदारसंघांच्या विकासाबाबत या बैठकीत चर्चा करण्यात आली. बैठकीत अन्य कोणताही विषय नव्हता, असे कोल्हे यांनी सांगितले आहे. त्यामुळे भविष्यात नेमकं काय काय घडणार, हे पाहणं महत्त्वाचं ठरणार आहे.
Leave a Reply