पुणे जिल्ह्यातील जेजुरी येथे आषाढी वारीदरम्यान झालेल्या भीषण अपघातात तीन महिला वारकऱ्यांचा दुर्दैवी मृत्यू झाला असून, अनेक वारकरी गंभीर जखमी झाले आहेत. भरधाव टेम्पोने वारकऱ्यांच्या दिंडीला धडक दिल्याने ही दुर्घटना घडली असून, संपूर्ण वारकरी संप्रदायावर शोककळा पसरली आहे.
मिळालेल्या माहितीनुसार, सोमवारी सकाळी आषाढी वारीदरम्यान जेजुरी परिसरात दिंडीसोबत असलेल्या एका टेम्पोने अचानक नियंत्रण गमावत वारकऱ्यांच्या दिंडीत घुसल्याने हा भीषण अपघात झाला. या धडकेत तीन महिला वारकऱ्यांचा घटनास्थळीच मृत्यू झाला, तर अनेक वारकरी गंभीर जखमी झाले. जखमींना तातडीने जवळच्या रुग्णालयात उपचारासाठी दाखल करण्यात आले असून, काहींची प्रकृती चिंताजनक असल्याची माहिती समोर आली आहे.
या दुर्घटनेनंतर घटनास्थळी मोठी धावपळ उडाली. पोलिस आणि प्रशासनाने तात्काळ घटनास्थळी धाव घेत मदत व बचावकार्य सुरू केले. अपघातामुळे काही काळ परिसरात तणावाचे वातावरण निर्माण झाले होते.
दरम्यान, या घटनेवर राष्ट्रवादी काँग्रेस (शरदचंद्र पवार) पक्षाचे आमदार रोहित पवार यांनी दुःख व्यक्त केले आहे. सोशल मीडियावरील आपल्या पोस्टमध्ये त्यांनी म्हटले की, “दिंडीतील वाहनानेच धडक दिल्याने जेजुरीजवळ तीन वारकऱ्यांचा दुर्दैवी मृत्यू झाला. ही घटना अत्यंत वेदनादायी आहे. जखमी वारकरी लवकर बरे व्हावेत, ही श्री विठ्ठलाच्या चरणी प्रार्थना. या अपघाताची सखोल चौकशी करून भविष्यात अशा घटना टाळण्यासाठी प्रशासनाने प्रभावी उपाययोजना कराव्यात. तसेच वारकऱ्यांच्या सुरक्षेला सर्वोच्च प्राधान्य द्यावे.”
दरम्यान, या भीषण अपघाताचे नेमके कारण काय, याचा तपास पोलिसांकडून सुरू असून, घटनेबाबत पुढील चौकशी केली जात आहे.
Leave a Reply