पुण्यातील कात्रज परिसरातून एक धक्कादायक घटना समोर आली आहे. 21 वर्षीय शिकाऊ डॉक्टर तरुणीचा इमारतीच्या नवव्या मजल्यावरून पडून मृत्यू झाला आहे. या घटनेने परिसरात खळबळ उडाली आहे. माया रेड्डी असं मृत तरुणीचं नाव आहे. माया रेड्डी ही भारती विद्यापीठात एमबीबीएसच्या द्वितीय वर्षाला शिक्षण घेत होती, अशी माहिती समोर आली आहे. माया ही मूळची हैदराबाद येथील असल्याची माहितीही समोर आली आहे. तिच्या शिक्षणासाठी ती पुण्यात राहत होती. दरम्यान, कात्रज परिसरातील एका सोसायटीमध्ये ती राहत होती.
नेमकं काय घडलं?
आज दुपारी साधारण एक वाजण्याच्या सुमारास माया रेड्डी हिने राहत्या इमारतीच्या नवव्या मजल्यावरून खाली उडी मारल्याची प्राथमिक माहिती आहे. या घटनेत ती गंभीर जखमी झाली. घटनेची माहिती मिळताच भारती विद्यापीठ पोलिसांनी तातडीने घटनास्थळी धाव घेतली. पोलिसांनी घटनास्थळाचा पंचनामा करत पुढील तपास सुरू केला आहे. माया रेड्डीने हे टोकाचं पाऊल नेमकं कोणत्या कारणातून उचललं, याचा तपास आता पोलिसांकडून केला जात आहे. अभ्यासाचा ताण होता का, अथवा यामागे अन्य काही कारण आहे का, हे तपासानंतरच स्पष्ट होणार आहे. दरम्यान, या घटनेमुळे भारती विद्यापीठ परिसरातील विद्यार्थ्यांमध्येही हळहळ व्यक्त केली जात आहे. भारती विद्यापीठ पोलिसांकडून या प्रकरणाचा पुढील तपास सुरू आहे.
पुण्यात आणखी एक आत्महत्या
दरम्यान, स्पर्धा परीक्षेचा अभ्यास करून अधिकारी होण्याचं स्वप्न घेऊन पुण्यात आलेल्या 25 वर्षीय तरुणानेही आत्महत्या केल्याची धक्कादायक घटना नारायण पेठ भागातून समोर आली आहे. प्रथमेश दिलीप देशमुख असं या तरुणाचं नाव असून तो मूळचा धाराशिव जिल्ह्यातील परंडा तालुक्यातील खासापुरी येथील रहिवासी होता. पोलिसांनी दिलेल्या प्राथमिक माहितीनुसार, आर्थिक विवंचना आणि डोक्यावर झालेलं कर्ज यामुळे प्रथमेशने हे टोकाचं पाऊल उचलल्याचा अंदाज आहे. स्पर्धा परीक्षेची तयारी करत अधिकारी होण्याचं स्वप्न पाहणाऱ्या प्रथमेशच्या मृत्यूने हळहळ व्यक्त होत आहे. या प्रकरणाचा पुढील तपास पोलिसांकडून सुरू आहे.
Leave a Reply