मुंबईसह उपनगरांमध्ये सुरू असलेल्या मुसळधार पावसाचा मोठा फटका नालासोपारा परिसराला बसला आहे. सततच्या पावसामुळे नालासोपारा रेल्वे स्थानकाजवळील रेल्वे ट्रॅकवर मोठ्या प्रमाणात पाणी साचले असून, रेल्वे वाहतुकीवर त्याचा गंभीर परिणाम झाला आहे. परिणामी, लोकल रेल्वे सेवा विस्कळीत झाली असून प्रवाशांना मोठ्या गैरसोयीचा सामना करावा लागत आहे.
कालही अशीच परिस्थिती निर्माण झाली होती. मात्र, आज सकाळपासून पुन्हा जोरदार पाऊस सुरू असल्याने रेल्वे ट्रॅकवरील पाण्याची पातळी वाढली आहे. त्यामुळे रेल्वे गाड्या संथ गतीने धावत असून काही सेवांमध्ये उशीर होत आहे.
सकाळी कामावर जाण्यासाठी घराबाहेर पडलेल्या हजारो नोकरदार आणि विद्यार्थ्यांचे मोठे हाल होत आहेत. रेल्वे ट्रॅकसह स्थानक परिसर आणि आजूबाजूचे रस्तेही पाण्याखाली गेल्याने नागरिकांना प्रवास करताना अडचणींचा सामना करावा लागत आहे.
दरम्यान, रेल्वे प्रशासन आणि स्थानिक प्रशासन परिस्थितीवर बारकाईने लक्ष ठेवून असून, ट्रॅकवरील पाणी कमी करण्यासाठी आवश्यक उपाययोजना सुरू आहेत. हवामान विभागाने पुढील काही तासांतही मुसळधार पावसाचा इशारा दिल्यामुळे नागरिकांनी आवश्यक ती खबरदारी घेऊनच प्रवास करावा, असे आवाहन प्रशासनाकडून करण्यात आले आहे.
Leave a Reply