मराठा आरक्षण आंदोलनाचे नेते मनोज जरांगे पाटील हे दिल्लीतील CJP आंदोलनाला पाठिंबा देण्यासाठी छत्रपती संभाजीनगरहून दिल्लीकडे रवाना झाले आहेत. रवाना होण्यापूर्वी माध्यमांशी संवाद साधताना त्यांनी आंदोलनादरम्यान विद्यार्थ्यांवर झालेल्या कथित पोलिस कारवाईवर तीव्र नाराजी व्यक्त केली.
मनोज जरांगे पाटील म्हणाले की, न्यायासाठी देशातील तरुण-तरुणी लढत असताना त्यांच्यावर क्रूरपणे कारवाई होणे योग्य नाही. त्यामुळेच आपण पुढील दोन-तीन दिवसांचे सर्व नियोजित दौरे रद्द करून दिल्लीला जाण्याचा निर्णय घेतल्याचे त्यांनी सांगितले. “न्यायासाठी लढणाऱ्या विद्यार्थ्यांवर अन्याय होत असेल, तर देशातील जनतेने शांत बसू नये,” असे आवाहन त्यांनी केले.
यावेळी त्यांनी सत्ताधाऱ्यांवरही टीका करत सत्तेच्या अहंकारामुळे सामान्य नागरिकांचा आवाज दाबण्याचा प्रयत्न होत असल्याचा आरोप केला. “सत्ता कायमची नसते. ज्यांनी मतदान करून सत्तेत बसवलं, तेच जनता पुन्हा खालीही खेचू शकते,” असे ते म्हणाले.
दिल्लीतील आंदोलनानंतर आंदोलनकर्त्यांवर गुन्हे दाखल करण्याच्या प्रक्रियेवर बोलताना त्यांनी अंतरवाली सराटी येथील मराठा आंदोलनाचा संदर्भ दिला. आंदोलनकर्त्यांवर अन्याय झाल्याचा दावा करत अशा घटनांची निष्पक्ष चौकशी व्हावी, अशी मागणी त्यांनी केली. तसेच या प्रकरणाची केंद्र सरकारने गंभीर दखल घ्यावी, असेही त्यांनी म्हटले.
मनोज जरांगे पाटील यांनी विद्यार्थ्यांवर झालेल्या कारवाईबद्दल चिंता व्यक्त करत जखमी विद्यार्थी आणि सामाजिक कार्यकर्ते सोनम वांगचुक यांची विचारपूस होणे आवश्यक असल्याचे सांगितले. दरम्यान, 9 ते 13 ऑगस्टदरम्यान नियोजित पश्चिम महाराष्ट्र दौरा कायम ठेवत मराठवाड्यातील दौरा रद्द करून आपण तातडीने दिल्लीला रवाना झाल्याची माहितीही त्यांनी दिली.
Leave a Reply