मराठा आरक्षणासाठी संघर्ष करणारे मनोज जरांगे पाटील यांनी आता थेट मुंबईला धडक देण्याची तयारी दर्शवली आहे. त्यांनी मुख्यमंत्र्यांच्या शासकीय निवासस्थान असलेल्या वर्षा बंगल्यावर आंदोलनाचा जोरदार इशारा दिला आहे. या आंदोलनाची तीव्रता अधिक करण्यासाठी, जरांगे पाटलांनी वर्षा बंगल्यावरील पाण्याच्या टाकीवर उपोषणाला बसणार असल्याचे जाहीर केले आहे. त्यांच्या या घोषणेने महाराष्ट्राच्या राजकारणात पुन्हा एकदा खळबळ उडाली आहे.
जरांगे पाटलांनी मराठा समाजाला स्पष्ट आवाहन केले आहे की, “माझ्यासोबत एकही मराठा घरी राहता कामा नये.” मुंबईतील या आंदोलनासाठी मराठा समाजाने मोठ्या संख्येने उपस्थित राहावे, असे त्यांचे म्हणणे आहे. सूत्रांच्या माहितीनुसार, जरांगे पाटलांच्या या आवाहनानंतर मोठ्या संख्येने मराठा बांधव मुंबईत येण्याची दाट शक्यता वर्तवली जात आहे.
आपल्या आंदोलनाचे ठिकाण वर्षा बंगला का निवडले, याचे स्पष्टीकरण देताना जरांगे पाटील म्हणाले की, “वर्षा निवासस्थान आमचे नाही का? या राज्यातल्या जनतेचे आहे ते. तिथे या महाराष्ट्रातल्या १४ कोटी जनतेला न्याय देणारा मुख्य व्यक्ती बसला आहे.” मुख्यमंत्र्यांनी जनतेचे प्रतिनिधी म्हणून काम करत असताना, जनतेला त्यांच्या निवासस्थानी आंदोलन करण्याचा पूर्ण अधिकार आहे, अशी त्यांची भूमिका आहे. “फडणवीस आमचे नाहीत का? ते जर आमचे नाहीत, तर मग ते महाराष्ट्राचे मुख्यमंत्री कसे?” असा सवाल उपस्थित करत, वर्षा बंगला हा जनतेचाच असल्याने तिथे आंदोलन करण्याचा पूर्ण हक्क असल्याचा पुनरुच्चार जरांगे पाटलांनी केला.
त्यांनी सरकारला उद्देशून विचारले की, “वर्षा बंगला आमचा आहे, जनतेचा. फडणवीस साहेब जनतेचे आहेत आणि आम्ही त्यांच्या बंगल्यावर आंदोलन करायला चाललो, तर का पोरांना येऊन द्यायचं नाही? याचा अर्थ महाराष्ट्रातली पोरं त्यांची नाहीत का?” या प्रश्नांतून त्यांनी आपल्या भूमिकेचा ठामपणे पुनरुच्चार केला आहे.
या आंदोलनाची नेमकी दिशा अजून पूर्णपणे स्पष्ट झालेली नाही. २९ तारखेला हे आंदोलन त्यांच्या मूळ ठिकाणी, म्हणजे अंतरवाली सराटी येथे होईल की मुंबईत, याबाबत अद्याप काहीही सांगता येणार नाही, असे जरांगे पाटलांनी म्हटले आहे. मात्र, त्यांचे आंदोलन मुंबईत वर्षा बंगल्यावर होण्याची शक्यता अधिक असल्याचे दिसते. त्यांच्या मते, कोणत्याही क्षणी काहीही होऊ शकते आणि वेळेवर कोणताही डाव टाकला जाऊ शकतो. मराठा आरक्षणाचा विषय मार्गी लागेपर्यंत आपला लढा सुरूच राहील, असा निर्धार त्यांनी व्यक्त केला आहे.
Leave a Reply