कल्याण-डोंबिवली महानगरपालिकेच्या (KDMC) 100 टक्के नालेसफाईच्या दाव्याची प्रत्यक्षात पोलखोल झाल्याचे चित्र समोर आले आहे. गोविंदवाडी रोड परिसरातील मुख्य नाल्याची दयनीय अवस्था पाहता, महापालिकेच्या दाव्यावर गंभीर प्रश्नचिन्ह उपस्थित होत आहे. गोविंदवाडी रोड परिसरातील हा नाला पश्चिम भागातील प्रमुख नाल्यांपैकी एक आहे. मात्र, नाल्यामध्ये मोठ्या प्रमाणात कचरा, प्लास्टिक आणि जलपर्णी साचल्यामुळे पाण्याचा प्रवाह जवळपास पूर्णपणे बंद झाला आहे. त्यामुळे पावसाळ्यात पाणी साचण्याचा आणि पूरस्थिती निर्माण होण्याचा धोका वाढल्याची नागरिकांची तक्रार आहे.
दरम्यान, पावसाळ्यापूर्वी कल्याण-डोंबिवली महानगरपालिकेकडून 100 टक्के नालेसफाई पूर्ण झाल्याचा दावा करण्यात आला होता. मात्र, पावसाळा सुरू होऊन जवळपास एक महिना उलटूनही गोविंदवाडी रोड परिसरातील नाल्याची साफसफाई झालेली नसल्याचे प्रत्यक्ष चित्रातून दिसून येत आहे.
स्थानिक नागरिकांनी महापालिकेच्या दाव्यावर नाराजी व्यक्त करत तातडीने नाल्याची सफाई करण्याची मागणी केली आहे. दरम्यान, KDMC च्या 100 टक्के नालेसफाईच्या दाव्याची प्रत्यक्षात पोलखोल झाल्याची चर्चा सुरू असून, याप्रकरणी महापालिकेची भूमिका काय असणार, याकडे नागरिकांचे लक्ष लागले आहे.
Leave a Reply