भारत श्रीलंका यांच्यात दोन सामन्यांच्या कसोटी मालिकेसाठी वेगवेगळी रणनिती आखली जात आहे. दोन्ही बाजूने प्लान आखले जात आहेत. त्यामुळे कोणता संघ वरचढ ठरणार हे येत्या काही दिवसात स्पष्ट होईल. श्रीलंकेत कसोटी मालिकेत विजय मिळवणं वाटतं तितकं सोपं नाही. या मालिकेत विजयासाठी टीम इंडियाला चांगलाच घाम गाळावा लागणार आहे. यासाठी टीम इंडियाने रणनिती आखली आहे. सराव सामन्यात विजय मिळवल्यानंतर टीम इंडिया पुन्हा एकदा सरावाला लागली आहे. 10 ऑगस्टला भारतीय संघाने मैदानात घाम गाळला आणि श्रीलंकेविरुद्धच्या रणनितीचा सराव केला. गॉलसाठी रवाना होण्यापूर्वी टीम इंडियाचा कोलंबोत शेवटचं सराव शिबिर होतं. त्यामुळे भारतीय संघाला जो काही सराव करायचा होता तो या ठिकाणी केला. या सरावात भारताने खास करून फलंदाजीचे डाव टाकले.
स्वीप शॉट्सचा सराव, कारण की…
श्रीलंकेतील खेळपट्ट्या फिरकीला मदत करणाऱ्या आहेत. त्यामुळे फिरकीचा सामना करण्यास तयार असणं गरजेचं आहे. त्यामुळे भारतीय संघाने 10 ऑगस्टला सर्व फिरकी गोलंदाजांचा सामना केला. तसेच एक वेगवान गोलंदाज गोलंदाजी करत होता. या सरावात भारताने फिरकीचा सामना करण्यासाठी स्वीप शॉट अस्त्र काढलं आहे. रेवस्पोर्ट्सच्या रिपोर्टनुसार, भारतीय संघाने मधल्या खेळपट्टीवर सामन्याचा सराव केला. फलंदाजांनी सामन्यासारखी स्थिती निर्माण करून आपल्या फलंदाजीच्या क्रमानुसार विविध प्रसंग तयार करून सराव केला. केएल राहुल आणि यशस्वी जयस्वालने 45 मिनिटं सराव केला. त्यानंतर देवदत्त पडिक्कल आणि कर्णधार शुबमन गिल गोलंदाजांचा सामना करण्यासाठी उतरले.
शुबमन गिलने केला जुन्या चेंडूचा सामना
श्रीलंकेच्या फिरकीचा अंदाज घेऊन भारताकडून रवींद्र जडेजा, कुलदीप यादव, मानव सुथार आणि सारांश जैन यांनी फिरकी गोलंदाजी केली. या गोलंदाजीचा सामना भारतीय फलंदाजांनी केला. प्रत्येक फलंदाजाने फिरकी गोलंदाजीविरुद्ध स्वीप आणि रिव्हर्स स्वीप फटके मारण्याचा सराव केला. तर य़ष्टीरक्षक ऋषभ पंतने फिरकी गोलंदाजीला आक्रमकपणे सामोरं जाऊन उंच फटकेबाजी केली. इतकंच काय तर श्रीलंकेतील रिव्हर्स स्विंगचा अंदाज घेऊनही सराव करण्यात आले. कर्णधार शुबमन गिलने रिव्हर्स स्विंगचा सामना करण्यासाठी एका थ्रोडाउन तज्ज्ञासमोर जुन्या चेंडूने सराव केला.
Leave a Reply