गेल्या काही महिन्यांपासून सोन्याच्या दरात मोठा बदल होताना पहायला मिळत आहे. अशातच आता सोने खरेदी करणाऱ्यांसाठी दिलासादायक बातमी समोर आली आहे. सोन्याच्या किमतीत किंचित घसरण झाली आहे. ही घसरण जरी फार मोठी नसली तरी दागिने खरेदी करणाऱ्यांना त्याचा फायदा होऊ शकतो. आज देशाची राजधानी दिल्लीमध्ये सोन्याच्या किमतीत 200 रुपयांची किरकोळ घट नोंदवली गेली. तसेच देशातील इतरही शहरांमध्ये सोन्याचे दर कमी झालेले आहेत. त्यामुळे ही सोने खरेदीची चांगली संधी आहे.
सोनं किती स्वस्त झालं?
99.9 टक्के शुद्धतेच्या सोन्याचा दर सोमवारी सर्व करांसह 1,59,400 रुपये प्रति 10 ग्रॅम इतका होता. तो 200 रुपयांनी घसरून मंगळवारी 1,59,200 रुपये प्रति 10 ग्रॅम झाला. दुसरीकडे, चांदीचा दर 2,60,700 रुपये प्रति किलो या पातळीवर स्थिर राहिला आहे. विश्लेषकांच्या मते, जागतिक भू-राजकीय तणावात झालेली घट, देशांतर्गत शेअर बाजारातील सकारात्मक वातावरण आणि रुपयाला मिळालेला आधार यामुळे गुंतवणूकदारांनी सोने खरेदीकडे पाठ फिरवली आहे. त्यामुळे सोन्याच्या किमतींवर दबाव निर्माण झाला. मात्र जागतिक बाजारातील मजबूत ट्रेंडमुळे देशांतर्गत बाजारातील घसरण मर्यादित राहिली.
आंतरराष्ट्रीय बाजारात सोने-चांदीचे दर
जागतिक बाजारात स्पॉट गोल्ड आणि स्पॉट सिल्व्हरमध्ये तेजी दिसून आली. स्पॉट गोल्डचा दर सुमारे 1 टक्क्यांनी वाढून 4,344.36 अमेरिकी डॉलर प्रति औंसवर पोहोचला, तर चांदीचा दर 70.43 अमेरिकी डॉलर प्रति औंसवर व्यवहार करत होता. मिरे अॅसेट शेअरखानचे कमोडिटी प्रमुख प्रवीण सिंह यांनी सांगितले की, कच्च्या तेलाच्या किमती घसरल्यामुळे सोन्याला फायदा होत आहे. अमेरिकेचे उपराष्ट्राध्यक्ष जेडी व्हान्स यांनी अमेरिका-इराण करारावर इलेक्ट्रॉनिक पद्धतीने स्वाक्षरी केल्यानंतर तेलाच्या किमती नव्या नीचांकी पातळीवर आल्या आहेत.
फेडरल रिझर्व्हच्या निर्णयाकडे लक्ष
कोटक सिक्युरिटीजच्या कमोडिटी रिसर्च विभागाच्या एव्हीपी कायनात चेनवाला यांनी सांगितले की, व्यापारी अमेरिकेतील महत्त्वाच्या आर्थिक आकडेवारीच्या घोषणेकडे आणि फेडरल रिझर्व्हच्या आगामी धोरणात्मक निर्णयाकडे लक्ष ठेवून असल्याने सावध भूमिका घेत आहेत. त्यामुळे चांदीचा दर 70.5 डॉलर प्रति औंसच्या आसपास स्थिर राहिला.
एलकेपी सिक्युरिटीजचे कमोडिटी आणि चलन संशोधन विश्लेषक जतिन त्रिवेदी यांनी सांगितले की, बाजारातील लोक अमेरिका-इराण कराराशी संबंधित घडामोडींवर बारकाईने लक्ष ठेवून आहेत. या घडामोडींचा बुलियन आणि कमोडिटी बाजारातील गुंतवणूकदारांच्या भावना व व्यवहारांवर थेट परिणाम होत आहे. त्यामुळे आगामी काळात सोन्याच्या दरात पुन्हा बदल होऊ शकतो.
Leave a Reply