नीट परीक्षा पेपरफुटी प्रकरणाच्या पार्श्वभूमीवर कॉकरोच जनता पार्टी अर्थात सीजेपीच्या वतीने 5 सप्टेंबर रोजी दिल्लीमध्ये काढण्यात येणारे आंदोलन आता मागे घेण्यात आले आहे. सीजेपीचे नेते सौरभ दास यांनी सुप्रीम कोर्टात याबाबत माहिती दिली. विद्यार्थ्यांवरील गुन्हे मागे घेण्याबाबत आणि पेपरफुटी प्रकरणात आत्महत्या केलेल्या विद्यार्थ्यांच्या कुटुंबीयांना नुकसानभरपाई देण्याबाबत सरकारने सकारात्मक भूमिका घेतल्यानंतर आंदोलन मागे घेण्याचा निर्णय घेण्यात आल्याचे त्यांनी सांगितले.
नीट परीक्षा पेपरफुटीच्या आरोपांनंतर देशभरात संतापाचे वातावरण निर्माण झाले होते. सरकारी यंत्रणेविरोधात विद्यार्थ्यांकडून आणि विविध संघटनांकडून आंदोलन करण्यात आले. याच पार्श्वभूमीवर अभिजीत दिपके यांच्या नेतृत्वाखालील कॉकरोच जनता पार्टीने तत्कालीन केंद्रीय शिक्षणमंत्री धर्मेंद्र प्रधान यांच्या राजीनाम्याची मागणी करत दिल्लीतील जंतर-मंतरवर महिनाभराहून अधिक काळ आंदोलन केले होते. त्यानंतर संसदेच्या दिशेने मोर्चाही काढण्यात आला होता. या आंदोलनादरम्यान पोलिसांकडून लाठीचार्ज झाल्याचा, तर आंदोलकांकडून पोलिसांवर दगडफेक झाल्याचा आरोप करण्यात आला होता.
अखेर धर्मेंद्र प्रधान यांनी शिक्षणमंत्री पदाचा राजीनामा दिल्यानंतर 25 जुलै रोजी सीजेपीने आंदोलन मागे घेतले होते. त्यावेळी सरकारकडून आंदोलकांना काही आश्वासने देण्यात आली होती. मात्र, या आश्वासनांची पूर्तता अद्याप झालेली नसल्याचा दावा करत सीजेपीने पुन्हा आंदोलनाची घोषणा केली होती. त्यानुसार 5 सप्टेंबर रोजी दिल्लीतील इंडिया गेटपासून पोलीस मुख्यालयापर्यंत मोर्चा काढण्याचे नियोजन करण्यात आले होते.
दरम्यान, या आंदोलनाच्या काही दिवस आधीच सुप्रीम कोर्टात महत्त्वाची सुनावणी झाली. विद्यार्थ्यांवर दाखल करण्यात आलेले गुन्हे मागे घेण्याची मागणी आणि नीट पेपरफुटी प्रकरणात आत्महत्या केलेल्या विद्यार्थ्यांच्या कुटुंबीयांना नुकसानभरपाई देण्याच्या मुद्द्यावर सुनावणी झाली. यावेळी सरकारने विद्यार्थ्यांवरील गुन्हे मागे घेण्यास तयार असल्याची भूमिका मांडली. तसेच, आत्महत्या केलेल्या विद्यार्थ्यांच्या कुटुंबीयांना एक कोटी रुपयांची नुकसानभरपाई देण्याबाबत सरकार सकारात्मक असल्याचे न्यायालयात सांगण्यात आले.
सरकारच्या या भूमिकेनंतर सीजेपीचे नेते सौरभ दास यांनी सुप्रीम कोर्टात 5 सप्टेंबर रोजी होणारे आंदोलन मागे घेत असल्याची माहिती दिली. त्यामुळे नीट पेपरफुटी प्रकरणावरून दिल्लीमध्ये पुन्हा होणारा सीजेपीचा मोर्चा आता होणार नसल्याचे स्पष्ट झाले आहे.
Leave a Reply