जवळपास सात महिन्यांच्या प्रतिक्षेनंतर तमिळनाडूचे मुख्यमंत्री आणि अभिनेते विजय यांचा बहुचर्चित 'जन नायकन' हा चित्रपट अखेर थिएटरमध्ये प्रदर्शित झाला. थलपती विजय यांच्या करिअरमधील हा शेवटचा चित्रपट असल्याने चाहते थिएटरमध्ये अक्षरश: गर्दी करत आहेत. यामुळे या चित्रपटाची कमाईसुद्धा तितकीच दमदार होत आहे.
'जन नायकन' या चित्रपटाने ओपनिंग वीकेंडलाच सोबत प्रदर्शित झालेल्या इतर सहा चित्रपटांना मागे टाकलं आहे. अभिनेत्यापासून तमिळनाडूचे मुख्यमंत्री बनलेले सी. जोसेफ विजय यांचा 'जन नायकन' हा चित्रपट तमिळ, हिंदी आणि तेलुगू भाषेत गुरूवारी प्रदर्शित झाला.
'जन नायकन'ने पहिल्या चार दिवसांतच तब्बल 124 कोटी रुपयांचा गल्ला जमवला आहे. तर हिंदीत पहिल्या तीन दिवसांत जवळपास 8.50 कोटी रुपयांची कमाई झाली आहे. या चित्रपटाने शनिवारपर्यंत भारतात सर्व भाषांमध्ये एकूण 146 कोटी रुपयांचा व्यवसाय केला आहे.
इतर हिंदी चित्रपटांमध्ये श्रेयस तळपदे आणि काजल अग्रवालच्या 'द इंडिया स्टोरी'ला फक्त 16 लाख रुपयांची ओपनिंग मिळाली. 'तेरा यार हूँ मैं' या चित्रपटाला फक्त 11 लाख रुपयांचीच ओपनिंग मिळाली आहे. तर अन्नू कपूर यांच्या 'उत्तर दा पुत्तर', खुशाली कुमारच्या 'दुल्हनियाँ ले आएगी', आदिल हुसैनच्या 'मॅक्स मिन अँड म्याऊजाकी' आणि 'इंद्रजाल' यांना पहिल्या दोन दिवसांत कमाईचा 10 लाख रुपयांचाही आकडा पार करता आला नाही.
'द इंडिया स्टोरी'ने 60 लाख रुपये, 'तेरा यार हूँ मैं'नं 40 लाख रुपये, 'दुल्हनियाँ ले आएगी'ने 17 लाख रुपये, 'उत्तर दा पुत्तर'ने 10 लाख रुपये, 'मॅक्स मिन अँड म्याऊजाकी'ने 10 लाख रुपये, 'इंद्रजाल'ने 10 लाख रुपये कमावले आहेत. या सर्वांवर 'जन नायकन' प्रचंड भारी पडला आहे.
Leave a Reply