हिंदी चित्रपटसृष्टीतील अजरामर चित्रपटांपैकी एक असलेल्या 'पाकीजा' या चित्रपटाशी अनेक रंजक किस्से जोडले गेले आहेत. त्यापैकी एक गुपित आजही अनेकांना आश्चर्यचकित करते. चित्रपटातील एका प्रसिद्ध मुजऱ्याच्या दृश्यात पडद्यावर दिसणारी अभिनेत्री मीना कुमारी नसून ती दुसरी अभिनेत्री असल्याचे अनेक वर्षांनंतर समोर आले.
'पाकीजा' हा चित्रपट पूर्ण होण्यासाठी तब्बल 14 वर्षे लागली. या काळात दिग्दर्शक कमाल अमरोही आणि मीना कुमारी यांच्या नात्यात अनेक चढ-उतार आले. त्याचबरोबर मीना कुमारी यांची प्रकृतीही खालावत गेली. त्यामुळे त्यांना दीर्घकाळ चालणारे नृत्यसीन साकारण्यास अडचणी येत होत्या.
विशेषतः 'तीर-ए-नजर' या प्रसिद्ध मुजऱ्याच्या चित्रीकरणावेळी त्यांची प्रकृती अत्यंत गंभीर होती. त्यामुळे हा डान्स पूर्ण करण्यासाठी अभिनेत्री पद्मा खन्ना यांना मीना कुमारी यांच्या जागी घेण्यात आले. या गाण्यात नृत्य करणाऱ्या अभिनेत्रीच्या चेहऱ्यावर कायम घुंगट असल्याने हा बदल प्रेक्षकांच्या लक्षात आला नाही.
माहितीनुसार, काही सीनसाठी मीना कुमारी यांनी स्वतः पद्मा खन्ना यांना आपल्या अभिनयाची शैली, हावभाव आणि देहबोली समजावून सांगितली होती. त्यामुळे पडद्यावर दोघींमध्ये कोणताही फरक जाणवला नाही.
चित्रपटातील अनेक लांब नृत्य सीन पद्मा खन्ना यांनी साकारली असली तरी हे रहस्य अनेक वर्षे प्रेक्षकांपासून लपून राहिले. त्यामुळे 'पाकीजा'शी संबंधित हा किस्सा आजही हिंदी चित्रपटसृष्टीतील सर्वात चर्चित आणि आश्चर्यकारक रहस्यांपैकी एक मानला जातो.
Leave a Reply