Game of Thrones : हॉलिवूडमधील सर्वाधिक लोकप्रिय आणि यशस्वी मालिकांपैकी एक असलेल्या Game of Thrones या मालिकेतील कलाकारांच्या मानधनाबाबत अनेक वर्षांपासून विविध चर्चा सुरू आहेत. विशेषतः मालिकेतील प्रमुख कलाकारांना प्रत्येक भागासाठी लाखो डॉलर्स मानधन मिळत असल्याच्या बातम्या वारंवार समोर येत होत्या. मात्र आता या चर्चांवर मालिकेतील ‘मदर ऑफ ड्रॅगन्स’ म्हणून प्रसिद्ध असलेल्या एमिलिया क्लार्कने स्वतःच स्पष्टीकरण दिले आहे.
अलीकडेच एका मुलाखतीदरम्यान एमिलिया क्लार्कला तिच्या प्रति एपिसोड मानधनाबद्दल प्रश्न विचारण्यात आला. अनेक अहवालांमध्ये कलाकारांना प्रत्येक भागासाठी सुमारे 2.84 कोटी रुपये मिळत असल्याचा दावा करण्यात आला होता.
यावर प्रतिक्रिया देताना एमिलिया क्लार्कने हसत उत्तर दिले की, प्रत्यक्षात तिला इतकी मोठी रक्कम मिळत नव्हती. तिने विनोदी शैलीत म्हटले, आम्ही इतकी कमाई करत नव्हतो. जर इतके पैसे मिळाले असते, तर आज मी अनेक पोर्शे कार चालवत असते. जरी तिने आपल्या खऱ्या मानधनाचा आकडा उघड केला नाही, तरी मालिकेमुळे मिळालेल्या उत्पन्नाने तिला आर्थिक स्थैर्य मिळाल्याचे तिने सांगितले.
आई-वडिलांचे गृहकर्ज फेडण्यात मिळाली मदत
एमिलिया क्लार्कने मुलाखतीत सांगितले की, मालिकेमुळे मिळालेल्या कमाईमुळे ती आपल्या आई-वडिलांचे गृहकर्ज फेडू शकली. तिच्या मते, ही गोष्ट तिच्या आयुष्यातील सर्वात महत्त्वाच्या उपलब्ध्यांपैकी एक आहे. तिने स्पष्ट केले की, जरी माध्यमांमध्ये प्रसिद्ध होणाऱ्या आकड्यांइतकी कमाई झाली नसली तरी या मालिकेने तिला आर्थिकदृष्ट्या सुरक्षित आयुष्य दिले.
मुलाखतीदरम्यान एमिलिया क्लार्कने वेतनातील लैंगिक समानतेच्या मुद्द्यावरही भाष्य केले. तिने सांगितले की, मालिकेतील पुरुष सहकलाकारांप्रमाणेच तिलाही मानधन मिळत होते. हा माझा पहिलाच मोठा प्रोजेक्ट होता. महिला असल्यामुळे माझे मानधन कमी ठेवण्यात आले आहे असे मला कधीच वाटले नाही असे तिने सांगितले. याआधी देखील तिने अनेकदा स्पष्ट केले होते की, गेम ऑफ थ्रोन्सच्या निर्मितीदरम्यान तिच्याशी मानधनाच्या बाबतीत कोणताही भेदभाव करण्यात आला नव्हता.
‘डेनेरिस टार्गेरियन’ने मिळवून दिली जागतिक ओळख
‘गेम ऑफ थ्रोन्स’ या मालिकेचा पहिला सीझन 2011 मध्ये प्रदर्शित झाला होता. तब्बल आठ सीझनपर्यंत चाललेल्या या मालिकेचा शेवट 2019 मध्ये झाला. या मालिकेने जगभरात लोकप्रियतेचे अनेक विक्रम प्रस्थापित केले. ‘गेम ऑफ थ्रोन्स’मुळे जागतिक स्तरावर प्रसिद्धी मिळाल्यानंतर एमिलिया क्लार्कने अनेक मोठ्या चित्रपट आणि मालिकांमध्ये काम केले.
Leave a Reply