Bhojpuri Movie: भोजपुरी चित्रपटसृष्टीचा विचार केला की डोळ्यासमोर सर्वप्रथम गावाकडचं वातावरण, कुटुंबातील नातेसंबंध आणि साध्या जीवनातील गोड-तिखट प्रसंग उभे राहतात. अशा कथा प्रेक्षकांना आपल्याच आयुष्याशी जोडलेल्या वाटतात, त्यामुळेच या चित्रपटांना प्रेक्षकांकडून मोठा प्रतिसाद मिळत असतो. आजच्या डिजिटल युगात तर या चित्रपटांची लोकप्रियता आणखी वाढली आहे. थिएटरसोबतच मोबाईल, यूट्यूब आणि ओटीटी प्लॅटफॉर्मवरही हे चित्रपट मोठ्या प्रमाणात पाहिले जात आहेत.
पूर्वी चित्रपटाचं यश केवळ बॉक्स ऑफिसवर ठरत होतं. मात्र आता परिस्थिती बदलली आहे. YouTube आणि OTT प्लॅटफॉर्ममुळे चित्रपटांची पोहोच अधिक व्यापक झाली आहे. अनेकदा एखादा चित्रपट थिएटरमध्ये फारसा गाजत नाही पण डिजिटल प्लॅटफॉर्मवर प्रदर्शित झाल्यानंतर तो सुपरहिट ठरतो. विशेषतः कुटुंबासोबत पाहता येणारे चित्रपट इंटरनेटवर दीर्घकाळ लोकप्रिय राहतात.
अशाच एका चित्रपटाने प्रेक्षकांची मनं जिंकली आहेत. 2024 मध्ये प्रदर्शित झालेला बड़की बहू छोटकी बहू हा चित्रपट सध्या चर्चेत आहे. या चित्रपटाचं दिग्दर्शन मंजुल ठाकुर यांनी केलं असून, कथाही त्यांनीच लिहिली आहे. या चित्रपटाची सर्वात मोठी खासियत म्हणजे त्याची स्टारकास्ट. यात रानी चटर्जी आणि काजल राघवानी या दोन लोकप्रिय अभिनेत्री पहिल्यांदाच जेठानी-देवरानीच्या भूमिकेत एकत्र दिसल्या आहेत. याशिवाय अंशुमान सिंह राजपूत, जय यादव आणि मनोज टायगर यांनीही महत्त्वाच्या भूमिका साकारल्या आहेत.
कुटुंबातील नात्यांची भावनिक गोष्ट
चित्रपटाची कथा एका कुटुंबाभोवती फिरते, जिथे पती-पत्नीमध्ये वाद होऊन घराचे दोन भाग पडतात आणि मध्ये भिंत उभी राहते. बाहेरून पाहता दोन्ही सुना सतत भांडताना दिसतात, पण प्रत्यक्षात त्या एकमेकींवर खूप प्रेम करतात. त्या दोघी मिळून तुटलेलं कुटुंब पुन्हा एकत्र आणण्याचा प्रयत्न करतात. या चित्रपटाला प्रेक्षकांकडून मोठं प्रेम मिळालं. थिएटरमध्ये याची रिलीज मर्यादित होती, मात्र डिजिटल प्लॅटफॉर्मवर या चित्रपटाने अक्षरशः धुमाकूळ घातला. यूट्यूबवर यातील सीन आणि क्लिप्सना कोट्यवधी व्ह्यूज मिळाले आहेत.
विशेष म्हणजे IMDb वर या चित्रपटाला 8.2 इतकी दमदार रेटिंग मिळाली आहे, जी कोणत्याही भोजपुरी चित्रपटासाठी मोठी उपलब्धी मानली जाते. चित्रपटाच्या कमाईचे अधिकृत आकडे उपलब्ध नसले तरी डिजिटल यश पाहता तो मोठा हिट ठरल्याचे मानले जात आहे. हा चित्रपट सध्या Dangal Play या ओटीटी प्लॅटफॉर्मवर उपलब्ध आहे. वेळ कमी असल्यास प्रेक्षक यातील लहान क्लिप्स यूट्यूबवरही पाहू शकतात.
Leave a Reply