गोंदिया जिल्ह्यात सोमवारी रात्री भरधाव ट्रकने एका SUV कारला जोरदार धडक दिली. या भीषण अपघातात तीन वर्षांच्या चिमुकल्यासह सहा जणांचा मृत्यू झाला, तर सात जण जखमी झाले आहेत. मृत आणि जखमी झालेले सर्वजण मजूर असून ते मध्य प्रदेशातील बालाघाट येथून तेलंगणातील करीमनगर येथे कामासाठी जात होते. या अपघातामुळे परिसरावर शोककळा पसरली आहे.
ट्रकची SUV ला जोरदार धडक
पोलिसांनी दिलेल्या माहितीनुसार, हा अपघात गोंदिया जिल्हा मुख्यालयापासून सुमारे चार किलोमीटर अंतरावर असलेल्या नागरा गावाजवळ झाला. समोरून येणाऱ्या SUV ला ट्रकने जोरदार धडक दिली. धडक इतकी भीषण होती की SUV चा चुराडा झाला. अपघाताची माहिती मिळाल्यानंतर पोलिसांनी घटनास्थळी पोहोचून वाहनातील लोकांना बाहेर काढले. या अपघातात सहा जणांचा जागीच मृत्यू झाला, तर सात जखमींना उपचारासाठी शासकीय रुग्णालयात दाखल करण्यात आले आहे.
मृतांमध्ये तीन वर्षांच्या चिमुकल्याचा समावेश
मृतांची ओळख किरण संतोष वैद्य (26), संतोष मात्रे (38), सुशीला मात्रे (35), रूपसेन तेजलाल सत्याकर (35), ज्योती रूपसेन सत्याकर (32) आणि तीन वर्षीय आरुष मात्रे अशी झाली आहे. हे सर्वजण मध्य प्रदेशातील बालाघाट जिल्ह्यातील किरनापूर तहसीलमधील रहिवासी होते. दरम्यान, पोलिसांनी ट्रक चालक मोहसिन खान (32) याच्याविरोधात निष्काळजीपणे आणि भरधाव वेगाने वाहन चालवल्याप्रकरणी संबंधित कलमांनुसार गुन्हा दाखल केला आहे. पोलिसांकडून या अपघाताचा पुढील तपास सुरू आहे.
छत्रपती संभाजीनगरमध्ये 21 वर्षीय तरुणाचा अपघाती मृत्यू
छत्रपती संभाजीनगर शहरातील टाऊन हॉल उड्डाणपुलावर मध्यरात्री घडलेल्या एका भीषण अपघातात 21 वर्षीय तरुणाचा दुर्दैवी मृत्यू झाला असून, या अपघाताचा थरारक CCTV व्हिडिओ समोर आला आहे. मित्राच्या काकूच्या अंत्यविधीवरून दुचाकीने परतताना वाहनावरील ताबा सुटल्याने हा अपघात घडला. कुटुंबातील एकुलता एक मुलगा गमावल्याने परिसरात सर्वत्र हळहळ व्यक्त केली जात आहे. मोहम्मद झिशान मोहम्मद अली (वय 21, रा. खोकडपुरा, पैठण गेट) असे मयत तरुणाचे नाव आहे.
Leave a Reply