अभिनेता सलमान खानचा भाऊ सौहेल खानने 2020 मध्ये पत्नी सीमा सजदेहशी घटस्फोट घेतला. लग्नाच्या बऱ्याच वर्षांनंतर या दोघांनी हा कठीण निर्णय घेतला होता. सोहैलपासून विभक्त झाल्यानंतर सीमा अनेकदा याविषयी विविध कार्यक्रमांमध्ये आणि मुलाखतींमध्ये मोकळेपणे व्यक्त झाली. मात्र आता सोहैल खानची पहिल्यांदा प्रतिक्रिया समोर आली आहे. ‘अलायन्स’ या शोमध्ये सोहैल आणि सीमा दोघं एकत्र दिसले. नुकताच या शोचा नवीन प्रोमो सोशल मीडियावर व्हायरल होत आहे. या प्रोमोमध्ये सोहैल आणि सीमा एकमेकांसमोर होते. यावेळी घटस्फोटाबद्दल बोलताना सोहैलने सर्व जबाबदारी स्वीकारली आहे.
या प्रोमोमध्ये सूत्रसंचालक कुणाल खेमू हा सोहैलला विचारतो की, पूर्व पत्नी सीमाला शोमध्ये पाहून त्याला कसं वाटतंय? त्यावर सोहैल म्हणतो, “खूपच छान वाटतंय. या सुंदर महिलेसोबत मी माझ्या आयुष्याची 25 वर्षे घालवली आहेत. मी नॅशनल टेलिव्हिजनवर हे मान्य करतो की, आमच्या नात्यात कधीही कोणतीही चूक झाली असेल, तर त्याची सर्व जबाबदारी मी घेतो.” सोहैलची ही कबुली ऐकल्यानंतर सीमा खुश होते आणि इतर स्पर्धकसुद्धा टाळ्यांचा कडकडाट करतात. या व्हिडीओवर नेटकरी विविध प्रतिक्रिया देत आहेत. ‘खरा मर्द असाच असतो’, असं एकाने म्हटलंय. तर ‘खान कुटुंबाचे संस्कार असेच आहेत’, अशा शब्दांत दुसऱ्याने कौतुक केलं. ‘यालाचं खरं नातं म्हणतात, हा आदर आहे’, असं आणखी एका युजरने लिहिलं आहे.
पहा व्हिडीओ-
View this post on Instagram
सीमा सजदेह आणि सोहैल खान यांनी 1998 मध्ये लग्न केलं होतं. या दोघांना योहान आणि निर्वाण ही दोन मुलं आहेत. लग्नाच्या 25 वर्षांनंतर या दोघांनी विभक्त होण्याचा निर्णय घेतला होता. घटस्फोटानंतर दोघं मिळून दोन्ही मुलांचं संगोपन करत आहेत. एका मुलाखतीत सीमने म्हटलं होतं की, जरी ती सोहैलपासून विभक्त झाली असली तरी खान कुटुंबाशी तिचं नातं कायम राहील. “माझ्यासाठी ते नेहमीच माझं कुटुंब असेल. माझी दोन्ही मुलं तिथे राहतात. घटस्फोट घेतला म्हणजे मी त्यांच्याशी माझं नातं तोडलं असा अर्थ होत नाही. मी स्वत:ची वेगळी ओळख निर्माण करण्याचा प्रयत्न केला. ‘द खान फॅमिली’चा टॅग काढून टाकणं महत्त्वाचं नव्हतं, तर माझी वेगळी ओळख निर्माण करणं गरजेचं होतं. सोहैल माझ्या मुलांचा पिता आहे आणि कायम राहील, अशा शब्दांत ती व्यक्त झाली होती.
Leave a Reply