नाशिक जिल्ह्यातील चांदवड येथे एका वृद्ध महिलेने मृत्यूशी दिलेल्या झुंजीने सर्वांना थक्क केले आहे. गेल्या दोन दिवसांपासून बेपत्ता असलेल्या ७५ वर्षीय चंद्रभागा धुळाजी व्हरकटे यांना अक्षरशः मृत्यूच्या दाढेतून बाहेर काढण्यात आले. २९ ऑगस्टपासून हरवल्या असलेल्या आजी बसस्थानकाजवळील उघड्या विहिरीत पडल्या होत्या. पूर्ण दोन दिवस अन्न-पाण्याशिवाय काळोख्या विहिरीत अडकूनही त्यांनी जीव वाचवला.
मिळालेल्या माहितीनुसार, चंद्रभागा आजी २९ ऑगस्ट रोजी मुलाकडे जात असल्याचे सांगून घराबाहेर निघाल्या होत्या. त्यानंतर मात्र त्या घरी परत आल्या नाहीत. कुटुंबीय शोध घेत असतानाच त्या बसस्थानकाजवळील उघड्या विहिरीत पडल्याचे समोर आले.
काळ आला पण वेळ आली नव्हती
विहिरीत पडल्यानंतर आजींनी धीर सोडला नाही. त्यांनी मोटारीच्या पाईपला आणि दोरीला घट्ट धरून ठेवले. विहिरीत असलेले साप, किडे, खेकडे यांनाही आजी घाबरल्या नाहीत. अंधाऱ्या विहिरीत दोन दिवस उपाशी-तहानलेली राहूनही त्यांनी आपली पकड कायम ठेवत जीव वाचवण्याचा प्रयत्न सुरू ठेवला. या संघर्षात त्यांनी अपार धैर्य दाखवले. दरम्यान, स्थानिक युवक गणेश पारवे यांच्या नजरेस विहिरीतील दृश्य पडले. त्यांनी तात्काळ इतर नागरिकांना कळवल्यानंतर परिसरात खळबळ उडाली. त्यानंतर स्थानिक युवक, चांदवड पोलीस आणि नगरपरिषदेचे पथक घटनास्थळी पोहोचले.
आजींना बाहेर काढण्यासाठी तातडीने बचावकार्य सुरू झाले. स्थानिक युवकांनी स्वतःच्या जीवाची पर्वा न करता विहिरीत उतरून प्रयत्न केले. अखेर खाटेच्या मदतीने त्यांना सुखरूप बाहेर काढण्यात आले. दोन दिवसांच्या झुंजीनंतर आजींची सुटका होताच परिसरातील लोकांनी सुटकेचा निःश्वास सोडला. चंद्रभागा आजींना तातडीने पिंपळगाव येथील रुग्णालयात दाखल करण्यात आले असून त्यांच्यावर उपचार सुरू आहेत.
यापूर्वीही अशी घटना घडली
आजी नेमक्या कशा पडल्या याचा तपास आता चांदवड पोलीस करत आहेत. या उघड्या विहिरीत यापूर्वीही अपघात झाल्याची माहिती नागरिकांनी दिली आहे. त्यामुळे प्रशासनाने तातडीने विहिरीभोवती सुरक्षा जाळी आणि संरक्षक कठडे बसवावेत, अशी मागणी नागरिकांकडून जोरदारपणे करण्यात येत आहे. दोन दिवस मृत्यूशी झुंज देत अडकून राहिलेल्या ७५ वर्षीय चंद्रभागा आजींच्या धैर्याने आणि स्थानिक युवकांच्या तत्परतेने अखेर त्यांना जीवनदान मिळाले आहे.
Leave a Reply