झी मराठी वाहिनीवरील 'सनई चौघडे' ही मालिका पहिल्याच भागापासून प्रेक्षकांच्या मनात घर करत आहे. लालबाग परळमधील हे मध्यमवर्गीय कुटुंब लोकांना भावत आहे. म्हणूनच मालिका सुरू होताच पहिल्याच आठवड्यात टॉप 10 मालिकांच्या यादीत 'सनई चौघडे'नं स्थान मिळवलं. आता या मालिकेच्या कथानकात अत्यंत रंजक ट्विस्ट पहायला मिळणार आहे.
ज्या लव्हस्टोरीची प्रेक्षक आतुरतेने वाट पाहत होते, त्याची सुरुवात या मालिकेत लवकरच होणार आहे. नेहमीच एकमेकांशी भांडणारे जय आणि शरू यांच्यात आता प्रेमाची पालवी फुटतेय. या दोघांमधील ऑनस्क्रीन केमिस्ट्री पाहण्यासाठी चाहते खूपच उत्सुक झाले आहेत. नुकताच या मालिकेचा नवीन प्रोमो सोशल मीडियावर पोस्ट करण्यात आला.
या प्रोमोवर प्रेक्षक लाइक्स आणि कमेंट्सचा वर्षाव करत आहेत. या नव्या प्रोमोमध्ये पहायला मिळतंय की जय आणि शरू रस्त्यावर उभे असतात, इतक्यात बस येते. शरू जयला चिडवत बसमध्ये चढते, पण जय मात्र तिथेच उभा राहतो. बसमध्ये चढलेली शरू जेव्हा जयसाठी हात पुढे करते, तेव्हा तो तिचा हात धरून बसमध्ये चढतो.
इथूनच जय आणि शरूच्या रोमँटिक केमिस्ट्रीची सुरुवात होते. मालिकेत चिन्मयी साळवी आणि राज हंचनाळे हे शरू आणि जयच्या भूमिकेत आहेत. या दोघांमधील 'तू तू – मैं मैं' आधी प्रेक्षकांना खूप आवडत होती. पण आता हळूहळू त्यांच्यातील प्रेमभावना जागृत होताना पहायला मिळणार आहे.
कथानकात आलेल्या या ट्विस्टमुळे जय आणि शर्वरीच्या नात्यात काय बदल होणार, हे पाहणं औत्सुक्याचं ठरणार आहे. ‘सनई चौघडे’ ही मालिका दररोज रात्री 8.30 वाजता झी मराठी वाहिनीवर प्रेक्षकांच्या भेटीला येते.
Leave a Reply