आसाममधील पूरस्थिती अत्यंत गंभीर झाली असून लाखो नागरिक या पुरामुळे बाधित झाले आहेत. विनाशकारी पुरामुळे लाखो लोकांचा बळी गेला आहे, तर अनेक जण पुरात अडकून पडले आहेत. बॉलिवूडपासून टेलिव्हिजनपर्यंतचे अनेक सेलिब्रिटी पूरग्रस्तांना मदत करण्यासाठी पुढे येत आहेत. या पुराचा फटका ‘साथ निभाना साथियाँ’ या मालिकेत गोपी बहुची भूमिका साकारलेल्या अभिनेत्री देवोलिना भट्टाचार्जीच्या कुटुंबालाही बसला आहे. नुकताच तिने सोशल मीडियावर एक व्हिडीओ शेअर केला आहे. यामध्ये ती तिच्या आई आणि कुटुंबीयांबद्दल सांगताना भावूक झाली. देवोलिनाने सांगितलं की तिची आई, मावशी आणि आजी पुरात अडकल्या असून त्यांचं घर पाण्याखाली गेलं आहे. “जर मी याआधी याबद्दल बोलले असते, तर माझ्या भावनांवर माझं नियंत्रण राहिलं नसतं. म्हणूनच मी आतापर्यंत व्हिडीओ बनवू शकले नाही. कारण मला माहीत होतं की मी रडेन”, असं देवोलिना म्हणाली.
या व्हिडीओमध्ये ती पुढे सांगते, “शिवसागर आणि नाझिरा ही ती ठिकाणं आहेत, जिथे मी लहानाची मोठी झाले. माझा जन्म तिथेच झाला आणि माझं शालेय, महाविद्यालयीन शिक्षणही तिथेच झालं. मी आतापर्यंत व्हिडीओ न बनवण्याचं कारण हेच होतं की मला हे सर्व पाहून सहनच झालं नसतं. दुर्दैवाने माझी आई अजूनही नाझिरामध्ये अडकली आहे. पण देवाच्या कृपेने आमचं जुनं घर अशा भागात आहे, जिथे पूर्णपणे पुराचं पाणी शिरलेलं नाही. मात्र आजूबाजूच्या परिसराचं खूप मोठं नुकसान झालं आहे. माझ्या आजीचं आणि मावशीचं घर पूर्णपणे पाण्याखाली गेलं आहे. सर्वकाही उद्ध्वस्त झालं आहे. काहीच शिल्लक राहिलेलं नाही.”
देवोलिनाचा व्हिडीओ-
View this post on Instagram
आसाममध्ये पुरामुळे अनेक घरं पाण्याखाली गेली असून लोकांना सुरक्षित ठिकाणी स्थलांतर करावं लागत आहे. “कष्टाने कमावलेलं सामान आणि त्यासोबतच्या आठवणी एका क्षणात पुराच्या पाण्यात वाहून गेल्या आहेत. मी लोकांना आवाहन करते की त्यांनी आसाममधील पूरग्रस्तांना मदत करण्याचं आवाहन करते. या कठीण काळात लहान किंवा मोठी मदत एखाद्या कुटुंबाला आशेचा किरण दाखवू शकते”, अशा शब्दांत ती व्यक्त झाली. देवोलिनाच्या या व्हिडीओवर नेटकऱ्यांनी विविध प्रतिक्रिया दिल्या आहेत.
Leave a Reply