राम मंदिरातील देणगीच्या चोरीच्या प्रकरणामुळे वाद निर्माण झाला आहे. अशातच आज श्रीराम जन्मभूमी तीर्थ क्षेत्र ट्रस्टची महत्त्वाची बैठक पार पडली. या बैठकीत ट्रस्टच्या पदाधिकाऱ्यांनी ऐतिहासिक निर्णय घेत विद्यमान महासचिव चंपत राय यांचा राजीनामा मंजूर केला. ट्रस्टी अनिल मिश्रा यांचाही राजीनामा स्वीकारण्यात आला आहे. यानंतर माजी आयएफएस अधिकारी कृष्ण मोहन यांची ट्रस्टच्या अंतरिम महासचिवपदी नियुक्ती करण्यात आली.
ट्रस्टचे कोषाध्यक्ष स्वामी गोविंद देव गिरी यांनी सांगितले की, ही बैठक मूळतः 11 जुलै रोजी होणार होती. मात्र, सुरू असलेल्या वादाच्या पार्श्वभूमीवर ती नियोजित वेळेपूर्वी म्हणजेच 6 जुलै रोजी घेण्यात आली. या बैठकीला ट्रस्टचे अध्यक्ष महंत नृत्य गोपाल दास महाराज, शंकराचार्य महाराज, युगपुरुष परमानंद, पेजावर मठाचे विश्वप्रसन्न तीर्थ, अयोध्याचे जिल्हाधिकारी शशांक त्रिपाठी उपस्थित होते. आवश्यक कोरम पूर्ण झाल्यानंतर झालेल्या या दीर्घ बैठकीत अनेक महत्त्वाचे निर्णय घेण्यात आले.
चोरीच्या घटनेमुळे व्यथित होऊन राजीनामा
बैठकीनंतर स्वामी गोविंद देव गिरी म्हणाले, ‘या घटनेमुळे आम्ही सर्वजण अत्यंत दुःखी आणि व्यथित आहोत. चोरी लहान होती की मोठी, हा मुद्दा नाही. मंदिरात अशी परिस्थिती निर्माणच कशी झाली, याची आम्हाला अधिक चिंता आहे. त्यामुळेच नियोजित तारखेपूर्वी ही बैठक बोलावण्यात आली. सद्य परिस्थिती लक्षात घेता महासचिव चंपत राय आणि ट्रस्टी अनिल मिश्रा यांनी आपल्या पदाचे राजीनामे सादर केले. चंपत राय या संपूर्ण घटनेमुळे अत्यंत व्यथित होते. दोषींना अटक होऊन त्यांना कठोर शिक्षा होईपर्यंत या पदावर राहणे योग्य ठरणार नाही, असे त्यांचे मत होते. त्यामुळे त्यांनी स्वेच्छेने राजीनामा दिला.’
कृष्ण मोहन यांच्याकडे महासचिवपदाची जबाबदारी
ट्रस्टचे कोषाध्यक्ष यांनी सांगितले की, भविष्यातील सर्व प्रशासकीय जबाबदाऱ्या आता कृष्ण मोहन यांच्याकडे सोपवण्यात आल्या असून ते अंतरिम महासचिव म्हणून काम पाहतील. राम मंदिरातील देणगी चोरी प्रकरणात एफआयआर दाखल करणारेही कृष्ण मोहनच होते. याशिवाय, ट्रस्टचे विशेष निमंत्रित सदस्य गोपाल राव उर्फ गोपाल नागरकटे यांना ट्रस्टमधून हटविण्यात आले आहे.
आजच्या बैठकीत ट्रस्टसाठी मुख्य कार्यकारी अधिकारी (CEO) निवडण्यासाठी तीन सदस्यीय समितीची स्थापना करण्यात आली. या समितीत निवृत्त न्यायमूर्ती प्रमोद कोहली, निवृत्त लेफ्टनंट जनरल विष्णुकांत आणि अणुशास्त्रज्ञ जनरल सुरेश हावडे यांचा समावेश आहे. ही समिती आता सीईओची निवड करणार आहे.
22 जुलैला पुढील बैठक
राम मंदिर ट्रस्टची पुढील बैठक 22 जुलै रोजी होणार आहे. तोपर्यंत विशेष तपास पथकाचा (SIT) अंतिम आणि सविस्तर अहवाल येण्याची अपेक्षा आहे. या बैठकीत त्या अहवालावर चर्चा करण्यात येणार असून, नव्या पदाधिकाऱ्यांची नियुक्ती, नवीन ट्रस्टींची निवड तसेच प्रशासकीय अधिकाऱ्यांच्या नियुक्तीबाबत अंतिम निर्णय घेतला जाणार असल्याची माहिती समोर आली आहे.
Leave a Reply