Kisan Credit Card Scheme: शेतीचे काम करण्यासाठी अनेकदा पैशांची गरज पडते. कधी बि-बियाणे खरेदी तर कधी खत खरेदीसाठी पैशांची गरज पडते. ट्रॅक्टरची दुरुस्ती तर कधी सिंचनासाठी मोठा निधी लागतो. पण शेती मालाला भाव मिळाला नाही. बचत सरली की शेतकऱ्यांसमोर कर्जाशिवाय पर्याय उरत नाही. अनेक बँका हात अखडता घेतात. तर काही ठिकाणी सावकरांकडून मोठ्या व्याजदराने उचल करावी लागते. त्यासाठी किसान क्रेडिट कार्ड योजना अत्यंत फायदेशीर मानली जाते. या कार्डच्या मदतीने शेतकर्यांना अत्यंत कमी व्याजदरावर कर्ज मिळते. यामुळे शेतीसंबंधीच्या कामासाठी त्याच्या हाती पैसे राहतात. किसान क्रेडिट कार्ड तयार करण्यासाठी अर्ज करण्यापूर्वी काही महत्त्वाच्या बाबी समजून घेणे आवश्यक आहे. यामुळे तुमचा अर्ज बाद होणार नाही आणि वारंवार बँकेच्या फेऱ्या माराव्या लागणार नाही.
तुमची पात्रता तपासा
किसान क्रेडिट कार्डचा फायदा घेण्यासाठी तुम्ही या योजनेसाठी पात्र आहात की नाही ते अगोदर तपासा. तुमची कागदपत्रं तपासा. हे कार्ड केवळ त्यांनाच मिळते, ज्यांच्या नावावर शेती करण्यायोग्य जमीन असते. बटाईने शेती करणारे सुद्धा या योजनेसाठी पात्र आहेत. त्यासाठी शेतकऱ्यांकडे करारपत्र असायला हवे.
अर्ज करण्यापूर्वी जाणून घ्या कागदपत्रे
केसीसीसाठी काही कागदपत्रांची अत्यंत गरज आहे. त्यासाठी तुमच्याकडे जमिनीसंबंधीची कागदपत्रे असणे आवश्यक आहे. त्यात खासरा, ओळखपत्र, रहिवाशी प्रमाणपत्र, पासपोर्ट आकाराचा फोटो असावा. सर्वात महत्त्वाचे म्हणजे शेतकर्यांचा सिबिल स्कोअर चांगला असावा. यापूर्वी शेतकऱ्याने कोणतेही कर्ज बुडवलेले नको. नाहीतर मग बँक व्यवस्थापक हे कार्ड तयार करण्यासाठी आवश्यक ती मंजूरी देणार नाही.
किसान क्रेडिट कार्डसाठी व्याजदर काय?
किसान क्रेडिट कार्डचे वैशिष्ट्ये म्हणजे शेतकऱ्यांना अत्यंत स्वस्त व्याजदरावर कर्ज मिळते. या योजनेत शेतकऱ्यांना 9 टक्के व्याजदराने कर्ज मिळते. पण सरकार त्यावर 2 टक्के सबसिडी देते. व्याजदर 7 टक्के दराने फेडावे लागते. इतकेच नाही तर वेळेत परतफेड करणाऱ्या शेतकऱ्यांना मोठा फायदा मिळतो. जर वेळेत अथवा निश्चित तारखेपूर्वी कर्जाची परतफेड केली तर सरकार अशा कर्जावर 3 टक्क्यांची अतिरिक्त सवलत देते. याचा अर्थ किसान क्रेडिट कार्डवर कर्जाची परतफेड करताना केवळ 4% दराने व्याज भरावे लागते. या योजनेत वेळेत कर्ज रक्कम परतफेड करणे हे मोठ्या फायद्याचे ठरते. अजून एक फायदा होतो की, बँक कार्डची क्रेडिट लिमिट वाढवते. पुढील वर्षी अधिक कर्ज मिळते.
Leave a Reply