प्रत्येकाला सुंदर आणि नितळ त्वचा हवी असते, विशेषतः ज्या महिला आपल्या त्वचेबद्दल खूप काळजी घेत असतात. मात्र चेहऱ्यावरील नको असलेले केस या सौंदर्यात मात्र अडथळा आणू शकतात. पण हे बहुतेकदा शरीरातील हार्मोनल असंतुलनामुळे, विशेषतः अँड्रोजनची पातळी वाढल्यामुळे होते.
याव्यतिरिक्त, पीसीओएसमुळे चेहऱ्यावरील नको असलेले केस ही समस्या अधिकच वाढू शकते. पण ही समस्या कमी करण्यासाठी सतत पार्लरमध्ये न जाता तुम्ही काही नैसर्गिक पद्धतींचा अवलंब केल्यास ही समस्या बऱ्याच अंशी कमी होण्यास मदत होऊ शकते. चला तर मग आजच्या लेखात आपण या खास उपायांबद्दल जाणून घेऊयात.
उपाय स्वयंपाकघरातच आहे
स्वयंपाकघरातील अनेक पदार्थांमध्ये असे गुणधर्म असतात जे तुमची त्वचा स्वच्छ ठेवण्यास आणि केसांची वाढ कमी करण्यास मदत करतात.
बेसन आणि हळद:
स्किन केअरसाठी बेसन आणि हळदीचे मिश्रण फार पूर्वीपासून वापरले जात आहे. बेसन त्वचेच्या वरच्या थरातील घाण आणि मृत पेशी काढून टाकण्यास मदत करते, तर हळदीतील घटक त्वचेवरील दाह कमी करण्यास आणि त्वचेचे आरोग्य सुधारण्यास मदत करतात.
साखर आणि लिंबू
साखर आणि लिंबाचे मिश्रण नैसर्गिक वॅक्सिंग एजंट म्हणूनही काम करते. साखर गरम करून त्यात लिंबाचा रस मिक्स करून एक चिकट मिश्रण तयार होते, जे त्वचेवरील नको असलेले केस मुळापासून काढण्यास मदत करते. लिंबामधील आम्लधर्मी गुणधर्म त्वचा स्वच्छ करतात आणि त्वचेचा रंग सुधारण्यास मदत करतात.
ओट्स आणि केळं
ओट्स आणि केळ्याचे मिश्रण संवेदनशील त्वचा असलेल्यांसाठी विशेषतः फायदेशीर आहे. ओट्स नैसर्गिक स्क्रबप्रमाणे काम करून त्वचेवरील मृत पेशी काढून टाकतात. केळं त्वचेला आर्द्रता देऊन मऊ करते. हे दोन्ही एकत्र वापरल्यास हा पॅक केवळ त्वचा स्वच्छ करत नाही, तर केसांची मुळे हळूहळू कमकुवत करण्यासही मदत करते.
पीठ, दूध आणि गुलाबपाणी
पीठ, दूध आणि गुलाबपाणी यांचे मिश्रण देखील एक प्रभावी उपाय आहे. दुधातील लॅक्टिक ॲसिड त्वचेच्या मृत पेशी काढून टाकते आणि नवीन पेशींच्या निर्मितीस प्रोत्साहन देते, ज्यामुळे त्वचा मऊ होते. नियमितपणे लावल्यास, केसांची वाढ मंदावते. ही पद्धत विशेषतः संवेदनशील त्वचा असलेल्यांसाठी उपयुक्त आहे.
पपई आणि हळद
पपई आणि हळदीचे मिश्रण देखील फायदेशीर असल्याचे वैज्ञानिकदृष्ट्या सिद्ध झाले आहे. पपईमधील एन्झाइम्स त्वचेचा वरचा थर काढून टाकण्यास आणि त्वचेवरील नको असलेल्या केसांच्या मुळांना कमकुवत करण्यास मदत करतात. हळदीसोबत हे मिश्रण त्वचेला पोषण देते आणि उजळ करते. नियमित वापरामुळे नको असलेल्या केसांची वाढ हळूहळू कमी होऊ शकते.
( डिस्क्लेमर : या आर्टिकलमध्ये देण्यात आलेली माहिती व उपाय हे सामान्य ज्ञानावर आधारित आहेत. आमचा याला दुजोरा नाही. ते अवलंबण्यापूर्वी तज्ज्ञांचा सल्ला जरूर घ्यावा.)
Leave a Reply