दिल्लीतील संसद परिसरात सुरू असलेल्या CJP आंदोलनाच्या पार्श्वभूमीवर केंद्र सरकारकडून मोठ्या हालचाली सुरू झाल्या आहेत. आंदोलनाची तीव्रता वाढत असताना गुप्तचर विभाग (IB), केंद्रीय गृह सचिव आणि दिल्ली पोलीस आयुक्त यांची उच्चस्तरीय बैठक सुरू असल्याची माहिती सूत्रांकडून मिळत आहे.
मिळालेल्या माहितीनुसार, सकाळी 10 वाजल्यापासून सुरू असलेल्या आंदोलनामुळे दिल्लीतील सुरक्षा यंत्रणा सतर्क झाली आहे. संसद परिसरात अजूनही मोठ्या संख्येने आंदोलनकर्ते उपस्थित असून, परिस्थितीवर नियंत्रण ठेवण्यासाठी आणि पुढील रणनीती ठरवण्यासाठी ही महत्त्वाची बैठक सुरू असल्याचे सांगितले जात आहे.
सूत्रांच्या माहितीनुसार, आंदोलनकर्त्यांना कशा प्रकारे नियंत्रित करायचे, सुरक्षा व्यवस्था आणखी कडक करण्याची आवश्यकता आहे का, तसेच आंदोलनावर तोडगा काढण्यासाठी कोणती भूमिका घ्यायची, यासंदर्भात बैठकीत सविस्तर चर्चा सुरू आहे.
दरम्यान, संसद परिसरात मोठा पोलीस बंदोबस्त कायम ठेवण्यात आला असून, परिस्थितीवर प्रशासनाकडून सातत्याने लक्ष ठेवले जात आहे. आंदोलनकर्ते अद्यापही संसद भवनाबाहेर ठामपणे उभे असल्याने, या उच्चस्तरीय बैठकीतून नेमका काय निर्णय घेतला जातो आणि आंदोलनावर कोणता तोडगा निघतो, याकडे देशभराचे लक्ष लागले आहे.
Leave a Reply