ओटीटी प्लॅटफॉर्मवर फक्त ओरिजिनल चित्रपटच प्रदर्शित होत नाहीत, तर थिएटरमध्ये फ्लॉप ठरलेल्या चित्रपटांचंही नशीब ओटीटीवर प्रदर्शित झाल्यानंतर अनेकदा पालटतं. 2026 मध्ये प्रदर्शित झालेल्या एका बायोग्राफिकल चित्रपटाच्या बाबतीतही असंच काहीसं घडलं. ऑगस्टरमध्ये हा चित्रपट प्रदर्शित झाला, पण बॉक्स ऑफिसवर तो सपशेल अपयशी ठरला. हाच चित्रपट आता ओटीटीवर प्रेक्षकांचं लक्ष वेधून घेत आहे.
या चित्रपटाचं नाव आहे 'जीडीएन'. थिएटरमध्ये फारशी कमाई न करू शकलेल्या या चित्रपटाने डिजिटल रिलीज झाल्यानंतर Netflix वर टॉप 10 मध्ये स्थान मिळवलं आहे. त्यामुळे बॉक्स ऑफिसवर निराशाजनक ठरलेल्या या चित्रपटाला ओटीटीच्या माध्यमातून नवी संधी मिळाली आहे.
‘GDN’ हा चित्रपट प्रसिद्ध भारतीय संशोधक आणि उद्योगपती जी. डी. नायडू यांच्या आयुष्यावर आधारित आहे. त्यांना भारताचे ‘एडिसन’ म्हणूनही ओळखलं जातं. अत्यंत सामान्य परिस्थितीतून सुरुवात करून तंत्रज्ञान आणि संशोधनाच्या क्षेत्रात स्वतःची वेगळी ओळख निर्माण करणाऱ्या जी. डी. नायडू यांच्या संघर्षाची आणि यशाची कहाणी या चित्रपटातून दाखवण्यात आली आहे.
या चित्रपटात आर. माधवनने जी. डी. नायडू यांची प्रमुख भूमिका साकारली आहे. विशेष म्हणजे माधवनने या चित्रपटाच्या निर्मितीतही सहभाग घेतला असून, त्याने पत्नी सरिता माधवनसोबत चित्रपटाची निर्मिती केली आहे. ‘रॉकेट्री: द नंबी इफेक्ट’नंतर माधवनचा हा आणखी एक बायोग्राफिकल प्रोजेक्ट आहे. चित्रपटात प्रियामणी, सत्यराज, जयराम आणि दुशारा विजयन यांच्याही महत्त्वाच्या भूमिका आहेत.
GDN या चित्रपटाला बॉक्स ऑफिसवर अपेक्षित प्रतिसाद मिळाला नाही. चित्रपटाची जगभरातील कमाई सुमारे 6.32 कोटी रुपये राहिली. मात्र, थिएटरमधील अपयशानंतर सिनेमाला आता OTTवर प्रेक्षकांचा चांगला प्रतिसाद मिळताना दिसत आहे. 4 सप्टेंबरपासून नेटफ्लिक्सवर स्ट्रीमिंग सुरू झाल्यानंतर ‘GDN’ टॉप 10 मध्ये ट्रेंड होऊ लागला.
Leave a Reply